Ադրբեջանցի մայրերը պահանջում են Իլհամ Ալիևի հրաժարականը՝ իրենց որդիների կյանքի գնով բռնապետական ռեժիմը պահպանել ձգտելու համար

Հոկտեմբերի 13-ին Facebook սոցիալական ցանցում կոչ է տարածվել մի խումբ ադրբեջանցի մայրերի կողմից, որոնք կարծում են, որ սեպտեմբերի 27-ին Իլհամ Ալիևի սանձազերծած պատերազմի իրական նպատակը Ալիևի բռնապետական և կոռումպացված ռեժիմի պահպանումն է. հայտնում է talyshistantimes.com կայքը։

Նրանց խոսքով՝ ադրբեջանցի երիտասարդները մահանում են, իսկ նրանց մարմինները նույնիսկ չեն տրվում ընտանիքներին: Այն փաստը, որ Ադրբեջանում սպանված և վիրավոր զինծառայողների թիվը պետական բարձր մակարդակով գաղտնի է պահվում, ցույց է տալիս, որ դա արվում է հասարակության մեջ խուճապ չառաջացնելու համար:

Ադրբեջանցի մայրերը կոչ են անում հեռացնել Իլհամ Ալիևին Ադրբեջանի ղեկավարությունից, որպեսզի չվերացնեն հազարավոր ադրբեջանցի երիտասարդների կյանքը: «Անկասկած, ոչ միայն սպանված և վիրավոր զինծառայողների մայրերը, այլ նաև հասարակության այլ խմբերի ներկայացուցիչներ կհարցնեն պարոն Ալիևին, թե ինչի՞ է փորձում հասնել և ի՞նչ գնով: Ամենայն հավանականությամբ, Ադրբեջանի բռնապետական համակարգը կպատասխանի այս հարցին սեփական ձախողմամբ»,– գրում է կայքը։

«Այսօր մեր որդիները զոհաբերում են իրենց կյանքը`ալիևյան կլանի բռնապետությունն ու կոռուպցիան պահպանելու համար: Այս օրերին մեր որդիները, նայելով մահվան աչքերին, պայքարում են ոչ թե մեր սուրբ հողերը վերադարձնելու, այլ Ալիևի իշխանությունը պահպանելու համար:

Հիմա մենք բարձրացել ենք և պահանջում ենք, որ նրանք պատասխանեն՝ հանուն ինչի՞ են կյանքերը կորցրել մեր երեխաները: Նախևառաջ, մենք պետք է համախմբվենք կեղեքող բռնապետական կլան-խունտայի դեմ և հարցնենք, թե որտե՞ղ են գտնվում մեր նահատակների մարմինները, ինչի՞ կարողացավ հասնել մեր երկիրն այս օրերի ընթացքում, ի՞նչ է ձեռք բերել: Ոչ ոք մեզ այս հարցերի պատասխանը չի տալիս: Բոլոր սուտ է: Ի՞նչ է ասում երկրի նախագահը: Նա ասում է, որ զոհերի թիվը պետական գաղտնիք է: Նա մեզանից թաքցնում է, թե մեր որդիներից ով է ողջ մնացել, և ովքեր ճանապարհին մահացել են: Մեր հարցերը չպետք է անպատասխան մնան:

Ալիևը ոչ մի բանի մասին չի մտածում, բացի այն բանից, թե ինչպես պահպանել իր կոռումպացված ռեժիմը մեր որդիների կյանքի գնով: Մենք չպետք է թույլ տանք, որ մեր երեխաները զոհաբերվեն:

Այսօր մեր պարտականությունն է Ալիևից պահանջել մեզ պատասխան տալ:

Եկեք միասնական լինենք: Ոչինչ չպետք է խանգարի մեզ տապալել Ալիևների կլանը, որը զոհաբերում է մեր երեխաների կյանքը և բոլորիս տանում դեպի մահ»,- նշված է հայտարարության մեջ։