Կաթնառատ գյուղում հայտնաբերվել է աղիքային հիվանդության 28 նոր դեպք

Տաշիրի տարածաշրջանի Կաթնառատ գյուղում հոկտեմբերի 9-ի ժամը 11-ի դրությամբ շարունակում են հայտնաբերվել աղիքային հիվանդության նոր դեպքեր: Իրականացված համաճարակաբանական հետազոտության և բակային համայցի ընթացքում հայտնաբերվել է ևս 28 նոր դեպք: Այդ մասին տեղեկացնում ՀՀ առողջապահության նախարարությունը։

Ընդհանուր դեպքերի թիվը 73 է, որից 64-ը հոսպիտալացված են, մնացած 9-ը գտնվում են ամբուլատոր հսկողության տակ:

Ներկայումս գյուղում ջրամատակարարումը դադարեցված է, բնակչության համար ջուրը բերվում է ցիստեռներով` մինչև ջրամատակարարման համակարգի ամբողջական մաքրման և ախտահանման աշխատանքների ավարտը: Մանրէաբանական հետազոտության նպատակով վերցված ջրի 12 նմուշից 7-ում հայտնաբերվել է շեղում, պացիենտներից վերցված 64 նմուշից 10-ում հայտնաբերվել է դիզենտերիայի հարուցիչ: