Հաագայի միջազգային դատարանում Ադրբեջանը պատասխանատվության է ենթարկվելու․ Գևորգ Կոստանյան

Գոյություն ունի պատերազմի 4 կոնվենցիա, և հատկապես չորրորդ կոնվենցիան վերաբերում է պատերազմական գործողությունների ժամանակ քաղաքացիական անձանց պաշտպանության խնդիրներին՝ Yerkir.am-ի հետ հարցազրույցում ասաց ՀՀ նախկին գլխավոր դատախազ Գևորգ Կոստանյանը։

Նա շեշտադրեց այն հանգամանքը, որ Ադրբեջանն արդեն ուղղակիորեն ռմբակոծում է քաղաքացիական օբյեկտները և քաղաքացիական անձանց, ինչը մեխանիկորեն հանգեցնում է պատերազմական հանցագործությունների։

«Սա լրջագույն հարց է, որը մեխանիկորեն իրավական հիմք է ստեղծելու հետագայում Հաագայի քրեական դատարանում վարույթ նախաձեռնելու համար։ ՄԱԿ-ի քրեական դատարանի իրավասությունը Հայաստանը և Ադրբեջանը չեն ընդունել, իհարկե, բայց, ըստ ընթացակարգի, ՄԱԿ-ի ԱԽ-ն կարող է նախաձեռնել Հաագայի քրեական դատարանում վարույթի իրականացում ընդդեմ Ադրբեջանի՝ մարդկության դեմ և պատերազմական հանցագործություններ կատարելու փաստով»,- ասաց Գևորգ Կոստանյանը։

Նա համոզված է, որ ռազմական առումով մենք ունենալու ենք լուրջ հաջողություններ և հաղթանակ։

«Ես դա չեմ քննարկում անգամ, բայց ես վստահ եմ, որ շատ կարևոր է, որպեսզի մենք հիմա նախաձեռնենք անհրաժեշտ բոլոր գործընթացները, որ ռազմական հաղթանակը կարողանանք ամրապնդել միջազգային իրավական եղանակով»,- ասաց Գևորգ Կոստանյանը։

Աննա Բալյան