ՏԵՍԱՆՅՈՒԹ. Փաշինյանն այցելել է Աշոտ Երկաթի ամրոց՝ Մանթաշաբերդ

ՀՀ վարչապետ Նիկոլ Փաշինյանն իր արձակուրդի առաջին օրն այցելել է Հայոց արքա Աշոտ Երկաթի ամրոց՝ Մանթաշաբերդ:

Այս մասին նա տեղեկացրել է «Ֆեյսբուք»-ի իր էջում ուղիղ եթերի ժամանակ:

«Աշոտ Երկաթի բերդը գտնվում է Իջևանից մոտ 7 կմ հեռավորության վրա: Այստեղ բերդի ավերակներն են մնացել: Խորհուրդ եմ տալիս անպայման այցելել, սակայն դրանից առաջ անպայման համացանցում կարդացեք Մանթաշաբերդի, Աշոտ Երկաթի մասին, Հայոց պատմությանը ծանոթացեք: Մենք պետք է իմանանք մեր պատմությունը և ճանաչենք ու զարգացնենք մեր հայրենիքը»,- նշեց Փաշինյանը:

Նա տեսանյութում ցույց տվեց քաղաքացիներին, թե ինչ գեղեցիկ տեսարան է բացվում:

Մանթաշաբերդը ռազմական կառույց է եղել և գտնվում է Հայաստանի Տավուշի մարզի Իջևան քաղաքից 7 կմ հարավ, Աղստև գետի աջ ափի անտառապատ լեռան գագաթին: Շրջապատված է լայն, բրգավոր պարիսպներով։ Պատկանում է Բագրատունիների ժամանակաշրջանին։