Մոսկվայում ահաբեկչական գործողություն է կանխվել

ՌԴ անվտանգության դաշնային ծառայությունը ՆԳՆ-ի և Քննչական կոմիտեի հետ համատեղ կանխել է Մոսկվայում ահաբեկչություն ծրագրող ահաբեկչական կազմակերպության գործունեություն. ըստ yerkir.am-ի` հայտնում է ՌԻԱ «Նովոստի»-ն:

Ահաբեկիչը, որը Կենտրոնական Ասիայից էր, գտնվել է Խիմկիի լքյալ ավտոտնակների տարածքում: Ձերբակալության ժամանակ նա սկսել է կրակել իրավապահների ուղղությամբ: Գրոհայինին չեզոքացրել են պատասխան կրակով:

Դեպքի վայրում հայտնաբերել են АКС-74У ինքնաձիգ, նռնակներ, իսկ ահաբեկչի վարձակալած բնակարանում` իրեղեն ապացույցներ, որ նա Ռուսաստանում արգելված միջազգային ահաբեկչական կազմակերպության անդամ է և ՌԴ մայրաքաղաքում պատրաստվում էր կրակ բացել մարդկանց ուղղությամբ:

Մերձմոսկվայում ձերբակալվել է սպանված ահաբեկչի եղբայրը, որն ասել է, որ ցանկանում էր խանգարել նրան մեկնել Սիրիա և հարել ավազակախմբի:

Ներկայումս իրավապահները որոնում են ահաբեկչի հնարավոր հանցակիցներին: