Լույս է տեսել «ՀՀ պետական խորհրդանշանները» ուսումնասիրությունը

Լույս է տեսել բանասիրական գիտությունների թեկնածու, Արևմտահայոց հարցերի ուսումնասիրության կենտրոնի տնօրեն Հայկազուն Ալվրցյանի՝ «Հայաստանի Հանրապետության պետական խորհրդանշանները» խորագրով  հույժ կարևոր ուսումնասիրությունը: 

Աշխատության մեջ ներկայացվում է Հայաստանի Հանրապետության խորհրդանշանների (դրոշ, զինանշան, օրհներգ) ընդունման համառոտ պատմությունը 1918-1920 թթ. և դրանց իմաստների ու խորհուրդների գիտական մեկնությունը: 

Հանրահայտ իրողություն է, որ խորհրդանշանների հիմքում ընկած են տվյալ ազգի պատմության կարևորագույն և առանցքային նշանակություն ունեցող իրադարձություններն ու փուլերը, որոնք այդ ազգի և նրա կերտած պետության կյանքում ունեցել են պետականաստեղծ կամ վճռական դերակատարություն: 

Հայաստանի Հանրապետության խորհրդանշանների հիմքում ընկած են. 

ա. Հայ ազգի պատմությունը՝ Մեծ ջրհեղեղից մինչև առաջին պետականության հիմնումը, այդ պետականության տարբեր փուլերի կարևորագույն իրողությունների արձանագրումը (հիմնականում՝ զինանշանի մեջ): 

բ. Քաղաքակրթական ինքնատիպության և ինքնուրույն՝ հոգևոր-կրոնական-մշակութային պատմության կարևորագույն իրողությունների արձանագրումը (հիմնականում՝ դրոշակի մեջ):

գ. Ազատության, պետականության վերականգնման և ազգային իղձերի իրականացման համար մղած կենսահաստատ պայքարի գաղափարը (հիմնականում՝ օրհներգի մեջ): 

Ուշագրավ է այն հանգամանքը, որ երեք խորհրդանշաններն էլ անցել են պատմական հոլովույթի միջով և ձևավորվել են ազատագրական պայքարի բովում: 

Փաստորեն մինչև ՀՀ Խորհրդարանի կողմից ընդունվելը՝ սրանք կամ սրանց նախնական տարբերակները հայ ազգի կողմից արդեն իսկ ընդունված են եղել որպես ազատագրական պայքարի խորհրդանշաններ: