Մեր ոչ վարքագիծը, ոչ կուրսը, ոչ էլ օրակարգը Փաշինյանի քիմքով պայմանավորված չեն. Լ. Գալստյան

«Նիկոլ Փաշինյանը դադարել է քաղաքական և քաղաքագիտական կատեգորիաներով մտածել: Ափսոսում եմ, որ Հայաստանում քաղաքական մշակույթը, վարքագիծն ու խոսույթը՝ շնորհիվ Փաշինյանի, վերածվեցին փողոցային լեքսիկոնով և անհավասարակշիռ պահվածքով ինչ-որ սումբուրի…Ափսոսում եմ և ցավում, որ «քաղաքական մտքի» այդպիսի գոհարներ են սփռվում ՀՀ ամենաբարձր քաղաքական ամբիոնից»,-Aravot.am-ի հետ զրույցում ասաց ՀՅԴ Հայաստանի գերագույն մարմնի անդամ Լիլիթ Գալստյանը՝ անդրադառնալով երեկ ԱԺ նիստում վարչապետի արտահայտած հետեւյալ համոզմունքին՝ «հաջորդ խորհրդարանում տեղ են ունենալու միայն այն ուժերը, որոնք 2018թ.-ին պաշտպանել են ժողովրդական հեղափոխության արժեքները»:

Լիլիթ Գալստյանը նշեց. «Որքան էլ ցայտնոտի մեջ լինի Փաշինյանը, որքան էլ գիտակցի և տեսնի իր քաղաքական վարկանիշի անկումը, դա իրեն իրավունք չի տալիս քաղաքական դաշտի որևէ ներկայացուցչի հետ այդպես խոսելու: Քաղաքականապես որքան անհաս պետք է լինել, պետական մտածողությունից որքան բոբիկ՝ «Դաշնակցության» հասցեին այդպես խոսելու համար: Մեր ոչ վարքագիծը, ոչ կուրսը, ոչ էլ օրակարգը Փաշինյանի քիմքով պայմանավորված չէ»:

Մեր զրուցակցի բնորոշմամբ. «Իսկ իրականում Փաշինյանն արտահայտում է իր էությունը. պետական ինստիտուտները ուզուրպացնելուց հետո իրեն թվում է, թե պիտի հաջողի իր սրտի քաղաքական քարտեզը կազմել. զավեշտական է, բայց ավելի շատ՝ տխուր: Փաշինյանը վերածվել է պետականության դեմ ուղղված սպառնալիքի: Իսկ «հեղափոխությունը» վաղուց է պարտվել, պարտվել է հենց Փաշինյանի և թիմի ջանքերով: Թող զուր թշնամիներ չփնտրեն…Կորսված հնարավորության համար եմ ափսոսում, և այն զոհերի համար, որ ունենք համավարակը կառավարելու կառավարության անճարակության արդյունքում»:

Լուիզա Սուքիասյան