Սա այն եզակի դեպքերից է, երբ յուրաքանչյուրս կարող ենք փրկել նաև բուժաշխատողի կյանք. Արայիկ Բաղրյանի շնորհավորական ուղերձը

ԱՀ առողջապահության նախարար Արայիկ Բաղրյանը բուժաշխատողի օրվա առթիվ շնորհավորական ուղերձ է հղել.

«Այսօր, բոլոր ժամանակների ամենապահանջված մասնագետի՝ բժշկական աշխատողի տոն օրն է:

Սիրելի բժիշկներ, բուժքույրեր, բուժաշխատողներ, ի սրտե շնորհավորում եմ ձեզ մասնագիտական տոնի առթիվ:

Գաղտնիք չէ, բուժաշխատողի աշխատանքը բարդ է, առհասարակ և հատկապես բարդ է այսօր: Համավարակի պայմաններում առողջապահության համակարգը առերեսվում է իսկական մարտահրավերների: Բուժաշխատողները կատարում են ահռելի ծավալով աշխատանք՝ «առաջնագծում» ամենօրյա թեժ պայքար տանելով տակավին չբացահայտված վարակի հետ՝ վտանգելով սեփական կյանքը:

Շնորհակալություն Ձեր անձնվեր աշխատանքի, մարդասիրության համար, և ամենակարևորը մասնագիտական պարտականությունների իրականացման ընթացքում ցուցաբերած մեծ պատասխանատվության համար:

Սիրելի բուժաշխատողներ, միասին մենք արդեն երկար ճանապարհ ենք անցել՝ համատեղ ջանքերով կյանքի կոչելով բազմաթիվ ծրագրեր և նպատակներ: Վստահ եմ, մեկտեղելով ուժերը՝ հետևողական աշխատանքի արդյունքում առողջապահության համակարգը կունենա էլ ավելի նշանակալից ձեռքբերումներ և հաղթանակներ:

Վստահ եմ նաև՝ համավարակը շուտով կնահանջի և կյանքը կվերադառնա իր բնականոն հունին:

Համավարակով պայմանավորված այսօրվա ուղերձն իր բնույթով մի փոքր այլ է: Սա այն եզակի դեպքերից է, երբ յուրաքանչյուրս կարող ենք փրկել նաև բուժաշխատողի կյանք:

Հարգելի հայրենակիցներ, այսօր, երբ բուժաշխատողը իր ողջ ներուժը ծառայեցնում է բնակչության առողջության պահպանմանն ու վարակի դեմ պայքարին, մեզանից յուրաքանչյուրն պարտավոր է պահպանել վարակից պաշտպանվելու տարական կանոններ, չվտանգելու, թե իր և, թե բուժաշխատողի կյանքը:

Թանկագին բուժաշխատողներ, վերստին շնորհավորում եմ բժշկական համակարգի անխոնջ նվիրյալներիդ մասնագիտական տոնի առթիվ՝ մաղթում առողջություն, անվտանգ գործունեություն, ուժ ու կորով ձեր ամենօրյա բարդ ու պատասխանատու առաքելության մեջ: Առողջություն բոլորիս…»: