Նոր Զելանդիան ավելի քան 30 մլրդ դոլար կհատկացնի համավարակից տուժած տնտեսությանն աջակցելու համար

Նոր Զելանդիայի իշխանությունները հավելյալ 30,2 մլրդ ԱՄՆ դոլար կհատկացնեն տնտեսության վրա համավարակի բացասական ազդեցությունը մեղմելու համար. այս մասին գրում է ՏԱՍՍ լրատվական գործակալությունը՝ Նոր Զելանդիայի վարչապետ Ջասինդա Արդերնի խոսքերին հղումով. հայտնում է Yerkir.am-ը։

Նրա պնդմամբ՝ 2020 թվականի բյուջեի առանցքային խնդիրը կլինի 50 մլրդ նորզելանդական դոլարի (30.2 մլրդ ԱՄՆ դոլարի) չափով հատուկ ֆոնդ ստեղծելը:

«Վերականգնման ֆոնդը կապահովի խոշոր ներդրումներ աշխատանքի տեղեր ստեղծելու, ինչպես նաև մի շարք մասնագիտությունների գծով անվճար ուսուցում կազմակերպելու համար, կիրականացվի դպրոցներում անվճար սնունդ ծրագիրը և այլն»,- նշել է նա ու հավելել՝ կանխատեսումների համաձայն, առաջարկվող ծրագրերի իրականացման շնորհիվ կպահպանվի 138 հազար աշխատանքային տեղ և կապահովվի զբաղվածության աճ հաջորդ երկու տարիների համար:

Հիշեցնենք՝ Նոր Զելանդիայում վարակվածների ընդհանուր թիվը կազմում է 1497 մարդ: Արդեն բուժվել են 1411-ը, մահացել՝ 21-ը: Վերջին երեք օրն այստեղ վարակի նոր դեպքեր չեն գրանցվում: