«Բարսելոնա»-ն երկամսյա դադարից հետո վերսկսել է մարզումները

Կատալոնական «Բարսելոնա»-ն վերսկսել է մարզումները թիմի մարզաբազայում: Այս մասին հայտնում է ակումբի մամուլի ծառայությունը: 

Մոտ երկու ամիս դադարից հետո ֆուտբոլիստները մարզվել են անհատական ծրագրով և պահպանել են սոցիալական հեռավորությունը: Թիմի հետ մարզվել է նաև վնասվածքից հետո ապաքինված Լուիս Սուարեսը:

Երկու օր առաջ իսպանական երկու գրանդ ակումբների` «Ռեալ»-ի և «Բարսելոնա»-ի ֆուտբոլիստները վերադարձել են մարզաբազա: Ֆուտբոլիստները կորոնավիրուսի թեստեր կհանձնեն և բնակություն կհաստատեն ակումբների մարզաբազաներում:

Ավելի վաղ հայտնի էր դարձել, որ Իսպանիայի ֆուտբոլի առաջնության` Լա լիգայի, մյուս հատվածը չի չեղարկվի, և մրցաշրջանը կհասցվի ավարտին: Իսպանական բարձրագույն լիգայի, Ֆուտբոլի թագավորական ֆեդերացիայի և Իսպանիայի սպորտի խորհուրդի քննարկման արդյունքում են հանգել այս եզրակացությանը: Լիգան ավարտին հասցնելու հիմնական շարժառիթը եղել է ֆինանսական կողմը, քանի որ պանդեմիան լուրջ վնասներ է հասցրել Իսպանիային: