Թուրքիան մտադիր չէ օկուպացնել սիրիական հողերը. նշում է Աֆրինը բռնազավթած Էրդողանը

Անկարան աջակցում է Սիրիայի տարածքային ամբողջականությանը և մտադիր չէ բռնակցել նրա տարածքները. այս մասին հայտարարել է Թուրքիայի նախագահ Ռեջեփ Թայիփ Էրդողանը:

«Սիրիան մասնատող այս պատերազմում Թուրքիայի նպատակները չեն ներառում այնտեղ ներխուժում կամ սիրիական հողերի անեքսիա», - Ստամբուլում Էրդողանի ելույթն է մեջբերում թուրքական NTV հեռուստաալիքը:

Ըստ Էրդողանի՝ Թուրքիայի միակ նպատակն այն է, որպեսզի ստեղծվի պայմաններ՝  Թուրքիայում բնակվող 3.6 մլն և Թուրքիայի սահմանակից Իդլիբում 1.5 մլն սիրիացիները  անվտանգ տուն վերադառնան. «Մենք ցանկանում ենք հնարավորինս շուտ ապահովել Սիրիայի տարածքային ամբողջականությունն ու քաղաքական միասնությունը», - նշում է Էրդողանը՝ հավելելով, որ փախստականների համար Թուրքիան ծախսել է 40 մլրդ դոլար, այնինչ ԵՄ-ն տրամադրել է ընդամենը 3 մլրդ. հայտնում է Yerkir.am–ը:

Հիշեցնենք, որ 2018 թ. մարտին «Ձիթենու ճյուղ» ռազմական գործողությունից հետո Սիրիայի հյուսիսային մի շարք քաղաքներ՝ Աֆրինը, Ազազը և այլն հայտնվել են թուրքական տիրապետության տակ, որտեղ թուրքերն իրականացնում են թուրքացման քաղաքականություն: