Ազատամարտիկների կենսաթոշակները պետք է հավասարվեն զինվորական կենսաթոշակին. Դավիթ Իշխանյանը հանդիպել է Հադրութի շրջանի բնակիչների հետ

Մարտի 3-ին Հայ Հեղափոխական  Դաշնակցության կողմից Արցախի Հանրապետության նախագահի  թեկնածու առաջադրված  Դավիթ Իշխանյանը և Ազգային ժողովի պատգամավորի թեկնածուներ՝ Լեռնիկ Հովհաննիսյանը, Արմինե Հարությունյանը և Սուրեն Շինդյանը  նախընտրական հանդիպումներ են ունեցել Հադրութի շրջանի մի շարք գյուղական համայնքերի բնակիչների հետ: Թեկնածուներին նախ ներկայացրել է Հադրութի շրջանի Կոմիտեության ներկայացուցիչ Լևոն Հայրիյանը:

Դաշնակցության կողմից առաջադրված թեկնածուները համագյուղացիների հետ միասին առաջին հերթին այցելել են Արցախյան պատերազմում նահատակված ազատամարտիկների հիշատակը հավերժացնող կոթողներ, ծաղիկներ խոնարհել՝ հարգանքի տուրք մատուցելով իրենց մարտական ընկերներին:

Արցախի համապետական ընտրություններին մասնակցելու որոշումը  Դաշնակցությունը կայացրել է  հստակ  ու իրատեսական նպատակադրումներով:  Այս մասին Դրախտիկ գյուղի  ընտրողների հետ հանդիպմանն ասաց Լեռնիկ Հովհաննիսյանը՝ ընդգծելով, որ կուսակցությունն իր որոշումներն ընդունում է կոլեգիալ,  իսկ ծրագրերն իրագործում՝ բոլոր օղակների ներդաշնակ ու համահունչ գործունեությամբ: Ըստ այդմ,  ընտրողները կարող են վստահ լինել, որ Դաշնակցության օգտին  իրենց  քվեները չեն փոշիանալու:   Այնուհետև  ներկայացնելով ԱՀ Նախագահի թեկնածու, ՀՅԴ Արցախի Կենտրոնական Կոմիտեի  ներկայացուցիչ  Դավիթ Իշխանյանի մարտական  ուղին ու քաղաքական կենսագրությունը: Լ. Հովհաննիսյանը նշեց, որ   նախընտրական ծրագրի դրույթները Դաշնակցության ընդհանուր ծրագրի բաղկացուցիչն է:

Իր խոսքում, Դավիթ Իշխանյանը նշեց, որ Դաշնակցության  նախընտրական ծրագիրը կազմվել է մասնագիտական խորհրդակցությունների և կոլեգիալ քննարկումների արդյունքում: Ուստի, կուսակցության կողմից առաջադրված թեկնածուները հստակ են պատկերացնում  ծրագրում տեղ գտած   հիմնադրույթներով առաջարկվող  լուծման ուղիները: Առաջնահերթությունն ունենալով Արցախի անվտանգության ամրապնդումն ու տարածքային ամբողջականության պահպանումը: Այս համատեքստում Դ. Իշխանյանը կարևորել է Ազգ-Բանակ հայեցակարգի իրագործումը, որը նույնպես ծրագրի առաջնահերթությունների շարքում է:  Դաշնակցության նախընտրական ծրագրով նախատեսվում է սոցիալական հիմնախնդիրների  լուծման ամբողջական փաթեթ: Հեռանկարում՝ սոցիալական պետությունն է՝ երկրի  սոցիալ տնտեսական բնագավառներում իր կարգավորող դերակատարությամբ:   Նածագահի թեկնածուն մասնավորապես պետական կարգավորումների անհրաժեշտություն է տեսնում  փոքր և միջին բիզնեսի զարգացման ուղղությամբ: Ըստ Դ. Իշխանյանի,  նմանօրինակ կարգավորումների անհրաժեշտություն է զգացվում մասնավորապես  պետական գնումների համակարգում:  Պետության առանձնահատուկ ուշադրության կենտրոնում պիտի պահվի հանրապետության բոլոր բնակավայրերի համաչափ զարգացումը: Այս առումով պետական կարգավորումները, ըստ Դաշնակցության տեսլականի, ներդրվող ֆինանսական միջոցների համաչափ բաշխումն է՝   բնակավայրերում զարգացման նպատակային ծրագրերի իրագործման  համար:

-Դաշնակցությունը գիտակցում է այն  պատասխանատվության բեռը, որը բխում է նախընտրական ծրագրով  առաջարկվող իրական ու իրատեսական բարեփոխումներից:    Ընտրողների վստահության համապատասխան քվեների առկայության պարագայում,    քաղաքական ուժն  ունի համապատասխան ներուժ, քաղաքական կամք ու  վճռականություն   դրանք իրագործելու համար,- վստահեցրել է Դ. Իշխանյանը՝ անդրադառնալով նաև կրթության որակի բարձրացմանը, երիտասարդների ինքնադրսևորման հնարավորությունների ընձեռմանը վերաբերող ծրագրերին: 

Դաշնակցության ծրագրով նախատեսվում է Արցախյան ազատամարտի վետերաններին համար  թոշակի անցնելուց հետո սահմանել այնպիսի  պարգևավճարներ ու հավելավճարներ, որոնք համահավասար կլինեն զինվորական կենսաթոշակի չափին:  Այս մասին ասաց պատգամավորության թեկնածու Արմինե Հարությունյանը: Նա անդրադարձավ նաև Դաշնակցության այն ծրագրային դրույթին, որը վերաբերում է բնակարանային ապահովմանը: Մասնավորապես  հիպոթեքային վարկի մարման գումարը հնարավորինս մատչելի կդռանա տարիներով բնակարանի վարձ վճարող քաղաքացիների համար: Նախատեսվում է հիպոթեքային վարկի մարման ամսական գումարը  մոտ 200 հազար դրամից նվազեցնել՝ հասցնելով   100 հազար դրամի:

Այնուհետև, ԱԺ  պատգամավորության թեկնածուն   ներկայացրեց Դաշնակցության նախնըտրական ծրագրի սոցիալական այն բաղադրիչները, որոնք      նախատեսում են աշխատավարձերի ու կենսաթոշակների համապատասխանեցում  սպառողական նվազագույն զամբյուղին, ինչպես նաև շարունակական բարձրացում: 

-Դաշնակցության  ծրագրերը հեռահար են և նպատակաուղղված են լինելու հասարակության բոլոր խավերի համար  արժանապատիվ կյանքի  ապահովմանը,- նշել է Ա. Հարությունյանը՝ հավելելով, որ մեծամասամբ  դրանց իրագործման գրավականը  առաջիկա ընտրություններում ստացած վստահության աստիճանով է պայմանավորված լինելու: 

Դրախտիկում Դաշնակցության թեկնածուների հանդիպումը շարունակվել է անկաշկանդ մթնոլորտում կայացած երկխոսությամբ, որի ընթացքում համայնքի  բնակիչները   հետաքրքվել են մասնավորապես բարձրագույն  կրթության մատչելիության  ու որակի բարձրացման, ինչպես նաև գյուղատնտեսության զարգացման   ծրագրերով: Ի պատասխան հարցադրումներին,  պատգամավորության թեկնածու, Շուշիի Տեխնոլոգիական համալսարանի դասախոս,  գ.գ. թեկնածու, դոցենտ Սուրեն Շինդյանը նախ նշել է, որ գյուղատնտության մեջ պետական  ներդրումները նպատակաուղղվում են ֆերմերային մեծ տնտեսությունների և դրանց ենթակառուցվածքների զարգացմանը, մինչդեռ  գյուղացիական մանր տնտեսությունները մնում են ստվերում: Բացի այդ չեն ստեղծվում գյուղմթերքի իրացման հնարավորություններ՝ վերամշակող ձեռնարկությունների ու իրացման կետերի միջոցով: Բացի այդ,  թեկնածուն կարևորել է նաև գյուղատնտեսական որակյալ մասնագիտական կրթությամբ համապատասխան ներուժ ձևավորելու խնդիրը: Այս հիմնախնդիրների լուծումները ևս  ընդգրկված են  Դաշնակցության նախընտրական ծրագրում:  Նախագահի թեկնածու Դավիթ Իշխանյանն էլ հավելել է, որ գյուղատնտեսության զարգացման ռազմավարական ծրագիրը Դաշնակցության օրակարգում է:  Տեսլականում համապատասխան մասնագիտական  ուսումնասիրությունների անցկացումն է, իսկ այդուհետ՝  գյուղատնտեսությանն ուղղվող ֆինանսական միջոցների  ու նպատակային ներդրումները:

Դաշնակցության թեկնածուների՝ օրվա  նախընտրական հանդիպումների հաջորդ  կանգառները Ազոխի  և   Մեծ Թաղերի գյուղական համայնքներում էին:

Նախքան Մեծ Թաղերի բնակչության հետ հանդիպումը, Արցախյան ազատամարտի նահատակների հուշակոթողի պատվանդանին ծաղիկներ խոնարհելուց հետո, թեկնածուները այցելել են նաեւ հինավուրց Սուրբ Ամենափրկիչ եկեղեցի:

Համայնքի բնակչության հետ հանդիպմանը թեկնածուները ներկայացրել են նախընտրական ծրագիրը, որից հետո ծավալվեց անկաշկանդ երկխոսություն:  

Մասնավորապես Մեծ Թաղերի բնակիչներին  հետաքրքրում էին հաշմանդամ ազատամարտիկների սոցիալ-կենցաղային խնդիրների լուծմանը, ինչպես նաև գյուղատնտեսության,  համայնքում բնակության եկած  մասնագետներին վերաբնակչի կարգավիճակ տալու,  բնակարանային ապահովման ու պետական աջակցության արդարացի բաշխման վերաբերյալ հարցեր:

Տող գյուղում, Դաշնակցության թեկնածուները ընտրողների հետ հանդիպումից առաջ, նախ հարգանքի տուրք մատուցեցին իրենց մարտական ընկերների՝ Արմեն Գասպարյանի եւ Վիգեն Գրիգորյանի շիրիմներին:

Հադրութի շրջանի համայնքներում Դաշնակցության թեկնածուների օրվա նախընտրական հանդիպումների շարքը եզրափակվել է Տումի գյուղական համայնքում:   

Վան Նովիկով