ՄԻԵԴ-ը պարտավորեցրել է Ադրբեջանին 72 հազար եվրո վճարել լրագրող Խադիջե Իսմայիլովային

Մարդու իրավունքների եվրոպական դատարանը հրապարակել է ադրբեջանցի հայտնի լրագրող Խադիջե Իսմայիլովայի՝ 2014 թ. անօրինական ձերբակալության վերաբերյալ որոշումը, որով լրագրողը դատապարտվել էր 7.5 տարվա ազատազրկման:

ՄԻԵԴ-ն այդ գործում խախտումներ հայտնաբերեց մի շարք հոդվածքներով՝ անձեռնամխելիության և ազատության իրավունքի, արդար դատավարության իրավունքի և այլն և  պարտավորեցրեց Ադրբեջանին վճարել 72 հազար եվրո. այս մասին Yerkir.am-ը տեղեկանում է «Meydan TV»-ից:

Սա արդեն ՄԻԵԴ երկրորդ որոշումն էր Իսմայիլովայի գործով: ՄԻԵԴ-ն ավելի վաղ անօրինական էր ճանաչել նրա անձնական կյանք ներխուժումը, երբ նրա բնակարանում թաքնված տեսախցիկ էր դրվել, իսկ տեսանյութն էլ հրապարակվել էր համացանցում:

Իսմայիլովան Ալիևների ընտանիքի ծավալած ապօրինի գործունեության վերաբերյալ հետաքննություն էր վարել: Ըստ դրա՝ հայտնի էր դարձել, որ Ալիևները ԱՄՆ-ում ղեկավարում են 3 մլրդ դոլար արժողությամբ ակտիվներ, որոնք կատարվում են մի շարք ընկերությունների միջոցով և, ըստ Իսմայիլովայի, դա ֆինանսական կայսրության դեռ միայն մի փոքր մասն էր: