Ճապոնական «Diamond Princess» զբոսանավում կարանտինն ավարտվեց

Ճապոնիայում Diamond Princess զբոսանավի՝ կորոնավիրուսով չվարակված ուղևորները սկսել են ափ դուրս գալ՝ վիրուսի տարածման պատճառով հայտարարված կարանտինի ավարտից հետո. այս մասին հայտնում է Yerkir.am-ը՝ ՌԻԱ «Նովոստի»-ին հղումով: 

Նշվում է՝ ընդհանուր առմամբ նավից կհեռանա մոտ 500 մարդ։

3700 մարդկանցով լի զբոսանավն ուղևորության էր մեկնել հունվարի վերջին՝ ճապոնական Յոկոհամա քաղաքից՝ Կագոսիմա-Հոնկոնգ-Օկինաուա ուղերթով։ Սակայն, այդ ընթացքում Հոնկոնգից 80-ամյա ուղևորի մոտ ի հայտ է բերվել թոքաբորբ, որի պատճառը եղել է նոր տեսակի կորոնավիրուսը։

Տարածված վարակի պատճառով փետրվարի 3-ին արգելվել է՝ ուղևորությունից վերադարձած զբոսանավը մուտք գործի Յոկոհամայի նավահանգիստ:

Նավն ենթարկվել է երկշաբաթյա կարանտինի, ինչի հետևանքով վարակվել է ավելի քան 520 մարդ։

Yerkir.am-ն ավելի վաղ տեղեկացրել էր, որ անհայտ տեսակի վիրուսի համաճարակը բռնկվել է 11 մլն բնակչություն ունեցող Ուհան քաղաքում: Որոշ ժամանակ անց, սակայն, այն տարածվել է նաև Չինաստանից դուրս մի շարք երկրներում, ինչը համաշխարհային խուճապի պատճառ է դարձել: Այս պահի դրությամբ COVID-2019 կորոնավիրուսի զոհերի թիվը Չինաստանում հասել է 1770-ի, իսկ վարակման հաստատված դեպքերի թիվը՝ 70 548-ի: