Չինաստանի ԱԳՆ-ն հորդորում է չհավատալ կորոնավիրուսի մասին լուրերին

Չինաստանը պահպանում է 2019-nCoV կորոնավիրուսի հետ կապված իրավիճակում բաց և պատասխանատու մոտեցումը եւ օպերատիվորեն կիսվում է վերջին տվյալներով. ըստ Yerkir.am-ի՝ այս մասին հայտարարել է ՉԺՀ ԱԳՆ պաշտոնական ներկայացուցիչ Հուա Չունինը, հայտնում է ՌԻԱ Նովոստին:

Որոշ ԶԼՄ-ներ տարակուսանքներ են հայտնում այն մասին, որ Չինաստանի իշխանությունները զոհերի և վարակվածների մասին հստակ վիճակագրություն չեն ներկայացնում: Ավելի վաղ ԱՀԿ բարձրաստիճան փորձագետ Ջոն ՄքՔենզին Պեկինին մեղադրել է Ուհանում հիվանդության նոր դեպքերի մասին արագ չտեղեկացնելու մեջ:

«Մենք ուշադրություն ենք դարձրել որոշ կեղծ լուրերի, որոնք ավելի սարսափելի են, քան վիրուսը: Դուք, հավանաբար, գիեք, որ ԱՀԿ գործադիր տնօրենը վերջերս կրկին հույս հայտնեց, որ բոլոր կողմերը չեն հավատա լուրերին եւ չեն տարածի դրանք»,- մեկնաբանել է դիվանագետն ու հավելել. «Որոշ երկրներում համապատասխան կառավարական գերատեսչությունները ջանքեր են գործադրում կեղծ լուրեր տարածողներին պատասխանատվության ենթարկելու համար»:

Միևնույն ժամանակ Չունինը նաև հայտնել է, որ ՉԺՀ առողջապահության պետական կոմիտեն և Ուհանի առողջապահության կոմիտեն ամեն օր ճեպազրույցներ են անցկացնում ու հայտնում ակտուալ տեղեկատվություն:

«Չինաստանի պատասխանատու վերաբերմունքը, այդ հիվանդության տարածման դեմ պայքարում լուրջ և վճռորոշ միջոցները ճանաչում է ամբողջ միջազգային հանրությունը»,- պարզաբանել է նա:

Հիշեցնենք, որ դեկտեմբերի վերջին Չինաստանի իշխանությունները հայտնել են Հուբեյ նահանգի Ուհան քաղաքում անհայտ ծագման թոքաբորբի բռնկման մասին: Այդ հիվանդության հարուցիչը դարձել է նոր տեսակի 2019-nCoV կորոնավիրուսը: