«Գազպրոմ Արմենիա»-ն հորդորում է չհավատալ իր անունից վճարահաշվարկային փաստաթղթեր ներկայացնողներին

«Գազպրոմ Արմենիա» ՓԲ ընկերության տարածված հաղորդագրության մեջ ասվում է, որ ինչ-որ անձինք ընկերության անունից խանութներում ներկայացնում են վճարահաշվարկային կեղծ փաստաթղթեր և փորձում ձեռք բերել ապրանքներ։

«Վերջին շրջանում Հայաստանում գրանցվել են դեպքեր, երբ ինչ-որ անձինք՝ հանդես գալով «Գազպրոմ Արմենիա» ՓԲԸ-ի անունից, ներկայացնելով վճարահաշվարկային կեղծ փաստաթղթեր, տարբեր խանութներից փորձում են ձեռք բերել, կամ ձեռք են բերում տարատեսակ ապրանքներ:

«Գազպրոմ Արմենիա» ՓԲԸ-ն հայտարարում է, որ ընկերության բոլոր գնումները բացառապես իրականացվում են ապրանք վաճառող կամ մատակարարող կազմակերպությունների  հետ կնքվող պայմանագրերի հիման վրա:

Միաժամանակ  «Գազպրոմ Արմենիա» ՓԲԸ-ն հորդորում է ապրանք վաճառող կամ մատակարարող կազմակերպություններին վերը նշված դեպքերի գրանցման պարագայում չձեռնարկել որևէ քայլ ապրանք վաճառելու կամ փոխանցելու ուղղությամբ և դիմել իրավապահ մարմիններին»: