Թուրքիան մարտական կարուստներ ունի Սիրիայում՝ 4 զոհ, 9 վիրավոր

Թուրքիայի Պաշտպանության նախարարությունը հայտարարություն է տարածել, որում ասվում է, որ Սիրիայի Իդլիբ քաղաքում տեղի ունեցած բախումների ընթացքում թուրք զինվորները հայտնվել են Սիրիայի կառավարական ուժերի կողմից արձակված հրետանային կրակոցների տակ, ինչի արդյունքում մահացել է 4, վիրավորվել 9 թուրք զինվոր: Այս մասին Yerkir.am-ը տեղեկանում է թուրքական «Անադոլու» գործակալությունից:

Դեպքը տեղի է ունեցել այսօր առավոտյան: Ըստ թուրքական պաշտոնական հայտարարության՝ թուրք զինվորները Իդլիբ էին ուղևորվել այնտեղ տեղի ունեցող բախումները կանխելու համար:

Հիշեցնենք, որ Թուրքիան հոկտեմբերի 9-ին սկսել էր «Խաղաղության ակունք» ռազմական գործողությունը Սիրիայի հյուսիսում: Թեև դրանից մոտ 2 շաբաթ անց Մոսկվայում ՌԴ-ն և Թուրքիան պայմանավորվեցին, որ թուրքերը դադարեցնելու են ռազմական գործողությունները, այնուամենայնիվ բախումները շարունակվում են մինչ օրս: Սիրիայի կառավարական ուժերը՝ ՌԴ զորքերը աջակցությամբ, օրըստօրե առաջընթաց են արձանագրում և արդեն կարողացել են ազատագրել Իդլիբի նահանգի մեծ մասը, որի մյուս մասն էլ վերահսկում են Թուրքիայի կողմից հովանավորվող հակակառավարական ուժերը: