Վտանգված է հայկական մսի առկայությունը շուկայում. ընդդեմ սպանդանոցների՝ բողոքի ակցիա կառավարության դիմաց

Ստիպում են մորթն անել սպանդանոցում, առանց անհրաժեշտ պայմաններ ապահովելու՝ ըստ Yerkir.am-ի կառավարության դիմաց բողոքի ակցիա են իրականացնում  անասնապահները:

Կառավարության որոշմամբ՝ հունվարի 15-ից սպանդանոցային մորթի պահանջը պարտադիր կլինի սննդի շղթայի բոլոր օպերատորների համար:

«Կառավարության որոշում կա, որ անասունների մորթը պարտադիր պետք է   սպանդանոցներում իրականացնել, բայց համոզված եմ հենց ինքը որոշում գրողն էլ, ընդունողն էլ չգիտեն, թե ինչ է կատարվում սպանդանոցներում՝ կռիսանոց է»-ասաց բողոքի ակցիայի մասնակիցներից մեկը:

«Կառավարությունը իր այս որոշմամբ ստիպում է, որ այլևս անասուն չպահենք, թողնենք արտագաղթենք, թող շուկայում են վաճառեն դրսից բերված անհայտ ծագման մսեղեն»,- հավելեց մեկ այլ գյուղացի:

Նրանց համար անասունը սպանդանոց տեղափոխելը հավելյալ ծախս է ու գլխացավանք:

Բացի այդ, սպանդանոցների թիվն է քիչ․ «Օրինակ, Վայոց ձորում 1 սպանդանոց է, բայց մարզը 20 գյուղ ունի, սա խնդի՞ր է, թե՞ չէ․ իհարկե խնդիր է»։

«Անիմաստ ծախսերի փող մենք չունենք: Ի վերջո, այդ գումարը մեզանից է գնում:  Փոխարենը թող բացեն փոքր սպանդանոցներ, որտեղ նաև անասնաբույժ կլինի»,- ասաց գյուղացիներից մեկը:

Թողե΄ք, որ մանր ու միջին բիզնեսը զարգանա՝ ասացին բողոքի ակցիայի մասնակիցները:

Նրանց հետ հանդիպման եկավ Սննդի անվտանգության ծառայության ղեկավար Գեորգի Ավետիսյանը. «Անասնապահների դիտարկումների մի մասը ընդունելի է ինձ համար: Մենք այսօր ժամը 14։00-ին հանդիպելու ենք սպանդանոցների սեփականատերերի և  ներդրողների հետ, թող այստեղից 5-10 հոգի գան, բարձրացնեն հարցերը։ Այստեղ հարցեր են բարձրացվում, որոնք մեզ համար զարմանալի են, քանի որ սպանդանոցների տերերի հետ մենք լրիվ այլ բան ենք պայմանավորվել։ Որ ասում են՝ 20 հազար, 8 հազար, ենթամթերքի համար գումար, այդպիսի բաներ չպիտի լինեին։ Սպանդանոցների հետ պայմանավորվել ենք, որ տեղափոխումը սպանդանոցը պետք է իրականացնի»։

Հայաստանի տարածքում այս պահին գործում է 22 սպանդանոց, ևս 20-ի շինարարությունը ավարտին կհասցվի մեկ ամսվա ընթացքում՝ տեղեկացրեց Ավետիսյանը։

Բողոքի ակցիայի մասնակիցները հայտարարեցին՝ եթե կառավարությունը հարցին լուծում չտա, վաղն առավորտյան կրկին մայրաքաղաք են գալու՝ շարունակելու բողոքի իրենց ակցիան: