Քաղավիացիայի միջազգային կազմակերպությունը զգուշացնում է չշահարկել Իրանում ավիավթարի պատճառները

Քաղաքացիական ավիացիայի միջազգային կազմակերպությունը (ԻԿԱՕ) զգուշացնում է չշահարկել Իրանում ուկրաինական ինքնաթիռի կործանման պատճառները մինչեւ հետաքննությունն ավարտվելը, տեղեկացնում է ՌԻԱ «Նովոստի»-ն։

«Կազմակերպության ղեկավարությունն ընդգծում է այդ ողբերգության շահարկումից ձեռնպահ մնալու անհրաժեշտությունը մինչեւ հետաքննության ավարտը՝ Միջազգային քաղաքացիական ավիացիայի մասին կոնվենցիայի (Չիկագոյի կոնվենցիա) 13-րդ Հավելվածին համապատասխան»,- ասվում է ԻԿԱՕ-ի տարածած հայտարարությունում։

«ԻԿԱՕ-ն կապ է պահպանում համապատասխան պետությունների հետ եւ նրանց օգնություն կցուցաբերի, եթե դիմեն այդ հարցով»,- ավելացրել են կազմակերպությունում։

 ԻԿԱՕ ղեկավարությունը ցավակցություն է հայտնել աղետի առիթով։

«Ուկրաինայի միջազգային ավիաուղիների» Կիեւ թռչող Boeing 737-800-ը կործանվել էր Թեհրանի օդանավակայանից օդ բարձրանալուց անմիջապես հետո, չորեքշաբթի առավոտյան։ Պաշտոնական տվյալներով՝ զոհվել է 176 մարդ՝ 167 ուղեւոր Իրանից, Ուկրաինայից, Կանադայից, Գերմանիայից, Շվեդիայից եւ Աֆղանստանից, եւ անձնակազմի ինը անդամ։