Ամերիկյան կազմակերպությունը հրապարակել է 2019 թ. ամենաանհուսալի գաղտնաբառերի ցանկը

Կիբերանվտանգությամբ զբաղվող ամերիկյան Splashdata կազմակերպությունը հրապարակել է 2019 թ. ամենաանհուսալի գաղտնաբառերի ցանկը: Կազմակերպությունն այս ցուցակը հրապարակել է ավելի քան 5 մլն անձնական հաշիվները վերլուծելով, որոնց գաղտնաբառերը հայտնի են դարձել ցանցահեններին. այս մասին, ըստ Yerkir.am-ի, հայտնում է «ՏԱՍՍ» գործակալությունը:

«Չնայած ինձ ուրախացնում է, որ «password» գաղտնաբառն այլև առաջին հորիզոնականը չի զբաղեցնում, այնուհանդերձ օգտատերերը շարունակում են ընտրել գուշակելի թվերով և տառերով գաղտնաբառեր: Դրանցից են օրինակ 1q2w3e4r և qwertyuiop գաղտնաբառերը». – նշել է կազմակերպության տնօրեն Մորգան Սլեյնը:

2019 թ. վատագույն գաղտնաբառ է ճանաչվել 123456-ը. անձնական տվյլաների 4 տոկոսն այս գաղտնաբառով է արտահոսել: Երկրորդ հորիզոնականում է 123456789-ը, երրորդը qwerty-ն (ստեղնաշարի առաջին 5 տառերը): Տասնյակում են նաև 123321 և 654321 գաղտնաբառերը: Օգտատերերն օգտագործում են նաև welcome և password1 գաղտնաբառերը:

Կազմակերպության տնօրենը զգուշացնում է, որ աննշան փոփոխություն կատարելը գաղտնաբառը չի դարձնում ավելի հուսալի:

Այս ոլորտի մասնագետները խորհուրդ են տալիս օգտագործել բառեր կամ արտահայտություններ 12 և ավել նշաններով՝ կիրառելով մեծատառեր և փոքրատառեր: