ԼՈՒՍԱՆԿԱՐՆԵՐ. Հայաստանին մատակարարվելիք ՍՈւ-30ՍՄ կործանիչները

Ռազմական վերլուծաբան Լեոնիդ Ներսիսյանը ֆեյսբուքյան էջում հրապարակել է Ռուսաստանից գնված ՍՈւ-30ՍՄ կործանիչների լուսանկարներ. «Ահա հայկական ՍՈւ-30ՍՄ-ները, արդեն վերջին փորձարկումներն են անցնում պատվիրատուին հանձնելուց առաջ». – նշել է վերլուծաբանը:

Կործանիչները արտադրվել են Իրկուտսկի ռազմաօդային գործարանում: Ըստ տեղեկություններ՝ այն Հայաստան կհասնի 2020 թ. սկզբին: Նախնական խմբաքանակը կլինի 4, որը նախատեսվում է հասցնել 8-12-ի:

ՀՀ ՊՆ մամուլի խոսնակ Արծրուն Հովհաննիսյանը ժամանակին անդրադարձել էր կործանիչների ձեռքբերման անհրաժեշտությանը. ««Իսկանդերի» և նման այլ միջոցների մարտական վիճակի բերման ժամանակը զգալիորեն ավելի մեծ է, դրանց արձակման վայրի փոփոխությունը հնարավոր չէ արագ կյանքի կոչել, քանի որ կախված է բազում այլ հանգամանքներից, իսկ կործանիչը դա անում է անհամեմատ ավելի արագ, ընդ որում՝ դրա թևերի տակ եղած «իսկանդերանման» միջոցները հակառակորդի ՀՕՊ-ի համար ավելի բարդ է հայտնաբերելը»: