Իրանը նորագույն ցենտրիֆուգներ Է փորձարկում միջուկային գործարքի շրջանակից դուրս. Ռոհանի

Թեհրանը ներկայում ուրանի հարստացման IR-9 նորագույն ցենտրիֆուգի փորձարկումներ է իրականացնում. ըստ Yerkir.am-ի՝ հայտնում է ՌԻԱ «Նովոստի»-ն՝ դեկտեմբերի 18-ին Իրանի նախագահ Հասան Ռոհանիի խոսքերին հղումով, որն այս օրերին գտնվում է Մալայզիայում։

«Չնայած պատժամիջոցներին և տնտեսական ճնշմանը, մենք առաջ ենք շարժվում միջուկային ոլորտում: Այսօրվա դրությամբ մեզ մոտ աշխատում են IR-6 նոր ցենտրիֆուգները, IR-9 ցենտրիֆուգները փորձարկումներ են անցնում»,-ասել է Ռոհանին, որի խոսքը մեջբերված Է նրա պաշտոնական կայքում:

Իրանի ատոմային Էներգիայի կազմակերպության ղեկավար Ալի Աքբար Սալեհին ավելի վաղ հայտարարություն է տարածել այն մասին, որ ուրանի հարստացման IR-9 նորագույն ցենտրիֆուգի հզորությունը, որի վրա աշխատում է Իրանը, 50 անգամ ավելի մեծ է IR-1 հիմնական ցենտրիֆուգից:

Reuters լրատվական գործակալությունը, ՄԱԳԱՏԷ-ի զեկույցին հղումով, տեղեկացրել է, որ Իրանի միջուկային օբյեկտներում արդեն տեղակայված են IR-9 տիպի ցենտրիֆուգներ, ինչպես նաև մի շարք ուրիշներ, որոնք նախատեսված չեն միջուկային գործարքով։