Արցախում ընտրություններն անցել են բավականին ժողովրդավար, մրցակցային մթնոլորտում. Արարատ Միրզոյան

«Արցախի Հանրապետությունում կայացած ընտրությունները, Հայաստանի Հանրապետությունում նախորդ տարիներին կայացած ընտրությունների հետ համեմատած, պետք է փաստենք, և միշտ է արձանագրվել, որ անցել են բավականին ժողովրդավար, մրցակցային մթնոլորտում»,- այս մասին դեկտեմբերի 17-ին կայացած ԱՀ ԱԺ և ՀՀ ԱԺ միջև համագործակցության միջխորհրդարանական հանձնաժողովի հերթական նիստից հետո ճեպազրույցի ժամանակ նշել է ՀՀ ԱԺ նախագահ Արարատ Միրզոյանը՝ պատախասնելով «Ապառաժ»-ի հարցին:

«Այնուհանդերձ մենք չենք կարող բացառել, որ Հայաստանի Հանրապետությունում ընտրությունների հետ կապված ընկալումը, մշակույթն իր ազդեցությունն է ունեցել նաև արցախյան ընտրությունների վրա: Մեր երկու հանրապետությունները այնպիսի տեսանելի և անտեսանելի կապերով են իրար փոխկապակցված, որ մի տեղ առկա որևէ մշակույթ, անպայման իր ազդեցությունն ունենում է մյուս տեղում, եթե ոչ ամբողջությամբ կրկօրինակվում, ապա ազդեցություն առնվազն ունենում է»,- ասել է Արարատ Միրզոյանը: Նա ավելացրել է, որ ընտրությունները չեն կարող, չպիտի և երբեք այլևս հայկական միջավայրում երբեք չեն կեղծվելու, որովհետև կեղծված ընտրությունների, ընտրությունների վրա ապօրինի ազդեցություններ գործելը ծնում է արատավոր զանազան երևույթների մի ամբողջ շղթա, որի էջը պետք է համարել փակված:

«Այո, Արցախի Հանրապետությունում  ընտրությունները համեմատաբար ազատ են եղել: Բայց խոսքն այս տարբերակման մասին չէ, մենք որպես ազգ, որպես հանրույթ պետք է հասկանանք, որ զարգացման այլ աստիճանի վրա կարող ենք կանգնել, եթե որդեգրենք ավելի ժողովրդավար խաղի կանոններ, համակեցության նորմեր»,- նշել է Արարատ Միրզոյանը: