Արմեն Սարգսյանը ցավակցել է Վլադիմիր Պուտինին

Հայաստանի Հանրապետության նախագահ Արմեն Սարգսյանը ցավակցական ուղերձ է հղել Ռուսաստանի Դաշնության նախագահ Վլադիմիր Պուտինին՝ Կրասնոյարսկի երկրամասում տեղի ունեցած ողբերգական դեպքի կապակցությամբ. հայտնում են ՀՀ նախագահի աշխատակազմի հասարակայնության հետ կապերի վարչությունից:

Նախագահ Սարգսյանն իր ցավակցություններն է հայտնել զոհերի հարազատներին ու մերձավորներին, տուժածներին մաղթել շուտափույթ ապաքինում:

Հիշեցնենք, որ այսօր Կրասնյարսկում սգո օր է հայտարարված: հոկտեմբերի 19-ին ՌԴ Կրասնոյարսկի երկրամասի Շետինկինո ավանի մոտակայքում՝ Սեյբա գետի ջրամբարի պատվարի փլուզման հետեւանքով, ոսկու արդյունահանողների բանվորական ավանում ջրածածկ է եղել 2 հանրակացարան։ Փլուզված 5 ամբարտակների պատճառով վիրավորների թիվը հասել է 27-ի: Դեպքի հետևանքով 15 մարդ էր զոհվել, 5 հոգու ճակատագիրն առայժմ հայտնի չէ:

ՌԴ քննչական կոմիտեն հայտարարել է, որ ամբարտակներն ապօրինի էին կառուցված: