Իմ հանդիպումն է բնակիչներին հետ, բերել իր նկարներն է փակցնում. Փարաքար տանող մայրուղին համայնքապետի թեկնածուն պաստառապատել է

Փարաքար տանող մայրուղին համայնքապետի թեկնածու Դավիթ Մինասյանը «պաստառապատել» է: Օրենքով չնախատեսված վայրում փակցված քարոզչական նյութերի մի մասը  մյուս թեկնածուների նախաձեռնությամբ արդեն պոկված ու պատռված է:  

Սեպտեմբերի 29-ին համայնքում պատրաստվում են ղեկավար ընտրել:  Առաջադրված 4 թեկանածու կա՝  ներկայիս համայնքապետ Սամվել Վարդանյանը, նրա տեղակալ Սարդուր Թևոսյանը, մյուս երկուսը ավագանու անդամներ Դավիթ Մինասյանն ու Սամվել Ավետիսյանն են:

Թե որտեղ և ինչպես փակցնել պաստառները, նախապես կանոնակարգված է եղել, և «որտեղ ուզեմ՝  կփակցնեմ» սկզբունքը համյանքապետը չի հանդուրժել՝ ոստիկանություն, տեղական ընտրական հանձնաժողով դիմելուց հետո նրա անմիջական մասնակցությամբ դրանք հեռացվել են:

«Տարանք այնտեղ, որտեղ դրանց տեղն էր՝ աղբանոց: Իմ հանդիպումն է բնակիչներին հետ, բերել իր նկարներն է փակցնում: Մինասյանը ծառ չէր թողել, որի բնին պաստառ փակցրած չլիներ»,-  Yerkir.am-ին ասաց ներկայիս համայնքապետը:

Նրա փոխանցմամբ՝  բնակիչների կողմից  ևս բողոքներ  եղել են, ասել են՝  պաստառները, որոնք առանց իրենց համաձայնության են փակցվել,  չեն պոկվում,  պոկվելու դեքպում էլ՝  հետք է մնում: Պատերը  պետք է ներկվեն:

Համայնքապետը չի կարծում, թե քարոզարշավը լարված է եղել, սակայն նկատում է՝ սահմանված կարգը խախտվում է.

«Այն իրականացնում են մեքենաներով, դրոշակներով, բարձր երաժշտությամբ, թեև իրենք են որոշում ինչպես անցկացնել: Ինձ ժողովրդի աչքից գցելու նպատակով սուտ լուրեր են տարածում, թե Ֆրանսիայում, Հյուսիսային պողոտայում տներ, հարստություն ունեմ»,- ասաց նա:

Նախընտրական շրջանում լարվածություն չի նկատել նաև համայնքի բնակիչ Պողոսյան Հարությունը, ասում է՝ ամեն բան կարգին է, նախընտրած թեկնածուն էլ ներկայիս համայնքապետն է:

Համայնքապետի պաշտոնում 18 տարվա փորձառություն ունեցող Սամվել Վարդանյանը դժվարանում է պատասխանել՝ կարո՞ղ են իր մրցակիցները համայնքում հետագա զարգացում ապահովել: Հույս ունի՝ ով էլ ընտրվի, գոնե եղածը պետք է պահպանի, թեև կարծում է՝ ինքը  շարունկելու է ղեկավարել:

«Թեկնածուներից 2-ը աշխատաքային փորձ ընդհանրապես չունեն, իմ տեղակալը աշխատել է մի քանի հիմնարկներում: Եթե նա կարողանա մարդկանց այնպիսի ծրագիր ներկայացնել, որը իմ ծարագրից լավը կլինի, ի՞նչ կա, ժողովուրդը թող ընտրի»,- ասաց նա:

Որպես թեկնածու առաջադրելու հարցում համայնքապետի տեղեկալ Սարդուր Թևոսյանը խնդիր չի տեսնում, ասում է՝ մեկ տարի առաջ մտածված է  տեղակալ նշանակվել՝  հաջորդ տարի համայնքապետ առաջադրվելու մտադրությամբ:

«Սամվել Վարդանյանի հետ հարաբերություններս լավ են, ինքն անձամբ է ինձ առաջարկել իր տեղակալը լինել: Նախընտրական փուլում լարվածություն չկա»,- Yerkir.am-ին հայտնեց Թևոսյանը:

Փարաքարից հայտնում են՝  թեկնածուները 4-ն էլ անկուսակցական են, և որքան էլ տարօրինակ հնչի՝  իշխանությունները որևէ մեկին ակնհայտորեն չեն սատարում, իսկ ավագանու անդամ թեկանծուները, ովքեր մեր զանգերին չպատասխանեցին, նախկինում դատված են եղել: