ԱՄՆ-ը և Մեծ Բրիտանիան պայմանավորվածություն են ձեռք բերել մինչև 2020 թվականի հուլիսն առևտրային գործարք կնքելու վերաբերյալ

Մեծ Բրիտանիայի վարչապետ Բորիս Ջոնսոնը և ԱՄՆ նախագահ Դոնալդ Թրամփը պայմանավորվածություն են ձեռք բերել մինչև 2020 թվականի հուլիսը երկկողմ առևտրային գործարք կնքելու մասին: Այս մասին հայտնում է The Sun պարբերականը՝ հղում անելով բրիտանական կառավարության բարձրաստիճան ներկայացուցչի խոսքերին:

Ավելի վաղ Մեծ Բրիտանիայի արտաքին գործերի նախարար Դոմինիկ Ռաաբը հայտարարություն էր տարածել, ըստ որի՝  Brexit-ից հետո Մեծ Բրիտանիան մտադիր է ազատ առևտրի մասին համաձայնագրի կնքման ուղղությամբ աշխատել ԱՄՆ-ի հետ: ԱՄՆ նախագահն, իր հերթին, հաղորդել է, որ ԱՄՆ-ն ու Մեծ Բրիտանիան վստահ և արագ քայլերով ընթանում են դեպի առևտրային գործարքի կնքումը:

Նշվում է, որ Թրամփն ու Ջոնսոնը կարող են այդ որոշման մասին հայտարարել ՄԱԿ-ի Գլխավոր ասամբլեայի շրջանակում կայացած հանդիպման ընթացքում:

«Այժմ երկու կողմերն էլ մինչ հուլիս համաձայնագիր կնքելու քաղաքական կամք ունեն: Սա մեծ հաղթանակ է մեզ համար: Թրամփը նույնպես պատրաստ է Միացյալ Նահանգներում բարձրաձայն հայտարարել այդ մասին»,- մանրամասնել է թերթի աղբյուրը և հավելել, որ երկու կողմերն էլ հասկանում են, որ համաձայնագրի կնքումը պետք է իրականացվի մինչև հուլիս, քանի որ դրանից կարճ ժամանակ անց ԱՄՆ-ում սկսվելու է ընտրական շրջանը:

Թեև բանակցությունները ձևականորեն չեն կարող սկսվել այնքան ժամանակ, քանի դեռ Մեծ Բրիտանիան չի լքել ԵՄ-ն, պաշտոնատար անձինք արդեն մի քանի ամիս է« ինչ բանակցություններ են վարում ընդգրկման ոլորտը որոշելու շուրջ:

ԱՄՆ-ի ամենամեծ առաջնահերթությունը պողպատի ներմուծման բրիտանական մաքսատուրքերի զգալի նվազեցումն է, ինչպես նաև տեխնոլոգիական հսկաների համար թվային հարկի կրճատումը կամ, առհասարակ, դրա դադարեցումը:

Գործարքը, որին ձգտում են երկու երկրների ղեկավարները, կդառնա ազատ առևտրի մասին խոշորագույն համաձայնագիրը, որ ԱՄՆ-ն երբևէ կնքել է մեկ այլ երկրի հետ: