ԱՄՆ-ը և Չինաստանը պայմանավորվել են հոկտեմբերին վերսկսել առևտրային տարաձայնությունների շուրջ բանակցությունները

Չինաստանը և ԱՄՆ-ը հոկտեմբերին Վաշինգտոնում առևտրային խնդիրների վերաբերյալ բարձր մակարդակի բանակցությունների վերսկսման շուրջ պայմանավորվածություն են ձեռք բերել։ Այս մասին հայտնում է Bloomberg գործակալությունը՝ վկայակոչելով ՉԺՀ առևտրի նախարարության հայտարարությունը։

«Երկրները համաձայնություն են ձեռք բերել հոկտեմբերի սկզբին Վաշինգտոնում առևտրատնտեսական հարցերի շուրջ բարձր մակարդակով անցկացնել   չին-ամերիկյան բանակցությունների 13-րդ փուլը»,- նշված է գերատեսչության կայքում հրապարակված հաղորդագրությունում:

Հավելվում է նաև, որ աշխատանքային մակարդակով հանդիպումները կսկսվեն սեպտեմբերի կեսերին։

«Ո՛չ Չինաստանը և ո՛չ էլ ԱՄՆ-ը չեն ցանկանում, որ աշխարհն իրենց մեղադրի առևտրային պատերազմների սրման և համաշխարհային տնտեսությանը վնաս հասցնելու համար»,- բացատրել է Չինաստանի առևտրի նախարարության նախկին պաշտոնյան և հավելել, որ բանակցությունների վերսկսումը դեռևս չի նշանակում, որ կողմերը կարող են հասնել երկկողմանի պատժամիջոցների մեղմմանը:

Հիշեցնենք, որ առևտրային տարաձայնությունների շուրջ բանակցությունները դադարեցվել էին երկու երկրների միջև «մաքսատուրքային պատերազմի» սրման հետևանքով։