Իրանը միակողմանի կարգով չեղարկել է Չինաստանի հետ վիզային ռեժիմը

Իրանը միակողմանի կարգով չեղարկել է Չինաստանի հետ վիզային ռեժիմը՝ ներառյալ հատուկ վարչական շրջաններ համարվող Հոնկոնգի և Մակաոյի բնակիչների համար. հայտնում է РИА Новости-ն՝ վկայակոչելով Չինաստանում Իրանի դեսպանատան հայտարարությունը:

Չինաստանի քաղաքացիներն այսուհետ կկարողանան զբոսաշրջային և բիզնես ուղևորությունների նպատակով առանց վիզայի Իրանի  տարածք մուտք գործել: Յուրաքանչյուր մուտքից հետո երկրի տարածքում թույլատրվում է մնալ 21 օրից ոչ ավելի:

Դեսպանատունը նախազգուշացրել է նաև, որ Իրանում չեն գործում UnionPay, Visa և Mastercard կրեդիտ քարտերը, ինչպես նաև չի թույլատրվում երկիր ներմուծել մի շարք մթերքներ, ինչպիսիք են` ալկոհոլային խմիչքները, խոզի միսը, նաև` զենք- զինամթերք, պոռնկագրական բնույթի գրքեր ու ամսագրեր, ինչպես նաև իսլամի կամ Իրանի Իսլամական Հանրապետության հասցեին քննադատություն պարունակող գրքեր:

Նշվել է նաև, որ զբոսաշրջիկ կանայք պարտավոր են երկրի տարածքում գլուխը ծածկել, կրել երկար թևքերով հագուստ՝ չցուցադրելով մարմինը: Ինչ վերաբերում է տղամարդկանց, ապա նրանց արգելվում է շրջել կիսատաբատներով: