Ռուսաստանում է Իրանի ռազմածովային ուժերի հրամանատարը

Երեկ՝ երեկոյան Ռուսաստան է մեկնել Իրանի ռազմածովային ուժերի հրամանատար, ծովակալ Հոսեյն Խանզադին: Սանկտ Պետերզբուրգում ծովակալ Խանզադիին եւ նրան ընկերակցող զինվորական բարձրաստիճան պատվիրակությանը դիմավորել են ՌԴ ռազմածովային ուժերի ներկայացուցիչները. տեղեկացնում է ԻՌՆԱ-ն:

Իրանի ռազմածովային ուժերի ներկայացուցչական պատվիրակությունը Սանկտ Պետերզբուրգում է, մասնակցելու ՌԴ ռազմածովային ուժերի օրվա առիթով նախատեսված միջոցառումներին:

Սանկտ Պետերբուրգի օդանավակայանում, պատասխանելով լրագրողների հարցերին, ծովակալ Խանզադին ասել է, որ Ռուսաստանում է իր ռուս գործընկերոջ հրավերով: Նա նշել է, որ այցի ընթացքում քննարկվելու են երկու երկրների ռազմածովային ուժերի միջեւ համագործակցության ընդլայնման հնարավորությունները եւ հեռանկարները:

«Ռուսաստանն Իրանի հզոր հարևանն է, որը տարբեր ոլորտներում տարածաշրջանային եւ գլոբալ ազդեցիկ ուժ է: Իրանն էլ որպես Արևմտյան Ասիայի հզոր երկրներից մեկը, նույնպես ունի տարածաշրջանային եւ գլոբալ ազդեցության հանարավորություն: Երկու երկրների համագործակցությունն անկասկած, կարող է մեծ ձեռքբերումներ ունենալ համատեղ հետաքրքրություն ներկայացնող ծովային տարածքների անվտանգության համար»,- ասել է Իրանի ռազմածովային ուժերի հրամանատարը: