Թուրքիայում միջազգային ԶԼՄ-ները թիրախավորող զեկույց է հրապարակվել

Թուրքիայի «Քաղաքականության, տնտեսության և հասարակության հետազոտությունների» հիմնադրամը (SETA) հրապարակել է «Միջազգային մեդիակառույցների թուրքական մասնաճյուղերը» զեկույցը, որում թիրախավորվում էր ինչպես միջազգային հեղինակավոր լրատվամիջոցները, այնպես էլ թուրքական ընդդիմադիր ԶԼՄ-ները:

BBC Türkçe, DW Türkçe, VOA (Voice of America), Sputnik Türkiye, Euronews Türkiye լրատվամիջոցներից բացի, թիրախավորվել են նաև թուրքական Evrensel, Birgün, Yeni Yaşam, T24, Bianet, Gazete Duvar լրատվական միջոցները:

Իշխանությունների նկատմամբ քննադատությունները, կանանց նկատմամբ բռնությունները, գործադուլները լուսաբանող լրատվամիջոցները ներկայացվում են որպես «խնդիր»: Զեկույցում ներկայացվում է միջազգային լրատվամիջոցների` Թուրքիայում ծավալած գործունեությունը:

«Թուրքիայի լրագրողների արհմիությունը» պատրաստվում է հայց ներկայացնել SETA-ի դեմ: Մի շարք լրատվամիջոցներ, հասարակական կազմակերպություններ և լրագրողներ սոցցանցերում քննադատել են զեկույցը. հաղորդում  է evrensel.net կայքը:

Նշենք, որ, ըստ թուրքական ընդդիմադիր լրատվամիջոցների, SETA-ն ստանում  է թուրքական իշխանությունների աջակցությունը, իսկ այս զեկույցն այն բանի հետևանքն է, որ ընդդիմադիր մամուլի դեմ սահմանափակումներից հետո մարդկանց մեծամասնությունը սկսել է հետևել միջազգային ԶԼՄ-ների թուրքական ճյուղերին: