Արքայազն Հարիի և Մեգան Մարքլի որդու կնքամայր կդառնա հայ միլիոնատիրոջ կինը

Բրիտանիայի բնակիչները սպասում են հուլիսի 6-ին կայանալիք` արքայազն Հարիի և Մեգան Մարքլի առաջնեկի մկրտության արարողությանը. հայտնում է Express-ը:

Իրադարձությունը, սակայն, նոր մարտահրավեր է լինելու միապետական ավանդույթներին, քանի որ նորաթուխ ծնողները որոշել են լրատվամիջոցների ներկայացուցիչներին և լուսանկարիչներին թույլ չտալ  եկեղեցի մուտք գործել, ինչն իրական սենսացիա է:

Լրատվամիջոցի տեղեկություններով` սպասվող միջոցառմանը ներկա կլինի Մեգան Մարքլի վաղեմի ընկերուհին՝ Սերենա Ուիլյամսը, որն այս պահին Մեծ Բրիտանիայում է, քանի որ մասնակցում է Ուիմբլդոնի մրցաշարին։ Լրատվամիջոցների համոզմամբ` հենց հայտնի թենիսիստուհին, որը ամերիկահայ միլիոնատեր Ալեքսիս Օհանյանի կինն է, կդառնա Արչի Հարիսոնի կնքամայրերից մեկը։

Նշվում է նաև, որ թագավորական երեխայի երկրորդ կնքամայրը կդառնա Մեգան Մարքլի մյուս ընկերուհին` ոճաբան Ջեսիկա Մալրունին։

Ինչ վերաբերում է հարցին, թե ովքեր կդառնան երեխայի կնքահայրերը, ապա այդ հարցը ևս լուծված է. այդ դերում կլինեն արքայազն Հարիի վաղեմի ընկեր Մարկ Դայերը, ինչպես նաև Մարկուս Անդերսոնը, որը ծանոթացրել է Մեգանին ու Հարիին։

Թագավորական զույգի ներկայացուցիչներն ավելի վաղ հայտարարել էին, որ իրենց համար շատ կարևոր է պահպանել մկրտության գաղտնիությունը։ Նրանք երազում են ընտանեկան տոն կազմակերպել, այդ պատճառով էլ արարողությանը հրավիրված է միայն մեկ լուսանկարիչ, որի լուսանկարները հետագայում կտրամադրվեն լրատվամիջոցներին: