Վրացական սրճարանները որոշել են 20 տոկոսով բարձրացնել ռուս զբոսաշրջիկների համար գները

Բաթումում գտնվող «Գարդենս» սրճարանը որոշել է 20 տոկոսով բարձրացնել ռուս զբոսաշրջիկների համար գները` այսպիսով միանալով ռեստորանների ակցիային, որոնք «այդ կերպ են պատասխանում Ռուսաստանին վրացական տարածքների 20 տոկոսի օկուպացման համար». հայտնում է Грузия-Онлайн-ը:

Ավելի վաղ նման որոշման մասին հայտնել էր «Էզո» սրճարանը:

Վրաստանի խորհրդարանում անցկացվող` Ուղղափառության միջխորհրդարանական վեհաժողովի ժամանակ սկանդալ է տեղի ունեցել: Վրացի  ընդդիմադիր պատգամավորներին դուր չի եկել, որ Ռուսաստանի Պետդումայի պատգամավոր Սերգեյ Գավրիլովը, որը նախագահում էր նիստը, նստել է Վրաստանի խորհրդարանի խոսնակի տեղում: Ավելի ուշ ակտիվիստները հավաքվել են խորհրդարանի շենքի մոտ և այրել ՌԴ նախագահ Վլադիմիր Պուտինի նկարը: Այնուհետև իրավիճակն ավելի է լարվել: Վրաստանի նախագահ Սալոմե Զուրաբիշվիլին երկրում կազմակերպված ցույցերի համար մեղադրել էր Ռուսաստանին, ինչին ի պատասխան ՌԴ վարչապետ Դմիտրի Մեդվեդևը վրաց նախագահի հայտարարությունը «ոչ պրոֆեսիոնալ» էր անվանել՝ նշելով, որ Ռուսաստանի վրա մեղք բարդելու փորձերը խեղաթյուրում են իրավիճակը: