Վրաստանում ցուցարարների դեմ զրահամեքենա և այլ հատուկ միջոցներ են կիրառվել

Թբիլիսիի խորհրդարանի մոտ հարյուրավոր ցուցարարներին ցրելու համար Վրաստանի ՆԳՆ-ն կիրառել է ջրցաններ, ռետինե փամփուշտներ, զրահամեքենա, հրշեջ մեքենա և լուսաձայնային նռնակներ։ Դրա հետևանքով կան 69 տուժածներ և տասնյակ բերման ենթարկվածներ։ Այս մասին հայտնում է РИА Новости-ն։

Ռուսթավելի պողոտայում ընթացող բողոքի ակցիայի ժամանակ տուժել են նաև լրագրողներ, նրանցից մեկը կորցրել է աչքը։

Վրաստանի ներքին գործերի նախարար Գեորգի Գախարիան խորհրդարանի շենքի մոտ հայտարարել է, որ պատրաստ է անհրաժեշտության դեպքում հրաժարական տալ:

Վրաստանի Հանրային հեռուստատեսությունը հայտնել է, որ ցուցարարները ավերել են Ռուսթավելի պողոտայի վրա գտնվող «Վրացական երազանքի» գրասենյակը:

Արդեն տեղեկացրել ենք, որ Վրաստանի խորհրդարանում անցկացվող`Ուղղափառության միջխորհրդարանական վեհաժողովի ժամանակ սկանդալ է տեղի ունեցել: Վրացի  ընդդիմադիր պատգամավորներին դուր չի եկել, որ Ռուսաստանի Պետդումայի պատգամավոր Սերգեյ Գավրիլովը, որը նախագահում էր նիստը, նստել է Վրաստանի խորհրդարանի խոսնակի տեղում:

Ստեղծված իրավիճակին արձագանքել է նաև Վրաստանի նախկին նախագահ Միխեիլ Սահակաշվիլին, ով ասել է, որ պատրատ է միանալ ցուցարաներին. Հայտնում է վրացական ԶԼՄ-ները:

Այցով Մինսկում գտնվող Վրաստանի նախագահ Սալոմե Զուրաբիշվիլին դատապարտել է Վրաստանի նախկին նախագահին, որը կոչ էր արել վրացի ոստիկաններին չենթարկվել գործող իշխանությունների հրամաններին:

«Անընդունելի է, որ այլ երկրի քաղաքացին արտերկրից Վրաստանի ոստիկանությանը չհնազանդվելու կոչ է անում»,- հայտարարել է Զուրաբիշվիլին:

Զուրաբիշվիլիի խոսքով՝ «ապակառուցողական» ընդդիմադիր ուժերը, որոնք բռնություն են հրահրում, իրականացնում են «Մոսկվայի պլանը»:

Ցույցերի հետ կապված հայտարարությամբ է հանդես եկել նաև Վրաստանի վարչապետ Մամուկա Բախտաձեն :

Նրա խոսքով` Վրաստանի խորհրդարանի շենքի առջև զանգվածային անկարգությունների կազմակերպիչները պատասխանատվություն են կրելու երկրում իրավիճակն ապակայունացնելու փորձի համար. հաղորդում է ТАСС-ը: