Պուտինը` Զելենսկիի տաղանդի, իշխանությանը քննադատելու և Գոլունովի գործի մասին

ՌԴ նախագահ Վլադիմիր Պուտինն «ուղիղ կապ»-ի ժամանակ անդրադարձել է նաև Ուկրաինայի նոր նախագահ Վլադիմիր Զելենսկիին. հայտնում է РИА Новости-ն:

«Զելենսկին տաղանդավոր մարդ է, հիշում եմ նրա ելույթները Ուրախների և հնարամիտների ակումբում, սակայն այն, ինչ այժմ կատարվում է Ուկրաինայում, ծիծաղելի չէ»,- ասել է նա:

Անդրադառնալով պետությանը վիրավորանք հասցնելու մասին օրենքին` Պուտինը նշել է, որ իշխանության քննադատությունը պետք է ազատ լինի, սակայն իշխանությունը չի կարող ուշադրություն չդարձնել այն հանգամանքին, որ անարգում են պետության խորհրդանիշերը, և այդ օրենքը պայքարում է հենց նման երևույթների դեմ:

 ՌԴ նախագահին հարց են ուղղել նաև վերջերս ՌԴ –ում թմրանյութերի գործով  ձերբակալված լրագրող Իվան Գոլունովի մասին, որին ավելի ուշ ազատ արձակեցին ապացույցներ չունենալու պատճառով: Պուտինն ասել է, որ անհրաժեշտ է հետաքննություն անցկացնել Գոլունովի գործով բոլոր մեղավորներին բացահայտելու համար: