Մոլդովայի դեմոկրատները գաղտնի գործարք են առաջարկել ՌԴ-ին

Մոլդովայի Դեմոկրատական կուսակցության առաջնորդ Վլադիմիր Պլախոտնյուկը ՌԴ փոխվարչապետ Դմիտրի Կոզակի հետ հանդիպման ժամանակ նրան գաղտնի առաջարկ է արել: Այդ մասին Կոզակը պատմել է Коммерсантъ-ին:

Հանդիպումը կայացել է հունիսի 3-ին: Մոլդովացի պաշտոնյան Կոզակին ծրար է  փոխանցել, որում եղել են այն պայմանները, որոնց դեպքում դեմոկրատները համաձայն էեն կոալիցիա կազմել սոցիալիստների հետ: Դեմոկրատական կուսակցության  առաջնորդն առաջարկել է կտրուկ փոխել երկրի արտաքին քաղաքական ուղեգիծը և ռուսամետ ուղղություն որդեգրել, իսկ Մերձդնեստրի հակամարտության կարգավորումը, ըստ առաջարկի, պետք տեղի ունենա Մոլդովայի դաշնայնացման հիման վրա:

Կոզակը պատմել է, որ այդ առաջարկները զարմացրել ե ՌԴ-ին, քանի որ Դեմոկրատական կուսակցությունը հակառուսական տրամադրություններ ունի:

Մոսկվան Մոլդովայի նախագահին և Սոցիալիստների կուսակցությանը խորհուրդ է տվել չհամաձայնել որևէ գաղտնի գործարքի` անկախ այն բանից` ով է դրանք առաջարկում:

Հիշեցնենք, որ Մոլդովայում քաղաքական ճգնաժամ է:

Մոլդովայի սոցիալիստների կուսակցությունը, որը ռուսամետ է, և եվրոպամետ ACUM դաշինքը շաբաթ օրը խորհրդարանական մեծամասնություն են կազմել և երկիրը 3 ամիս սպասումից հետո նոր կառավարություն է ստացել: Երկրի Սահմանադրական դատարանը այդ որոշումն անօրինական է համարել: Կիրակի օրը Պավել Ֆիլիպը, որին դատարանը նշանակել է երկրի ժամանակավոր ղեկավար, հրաման է ստորագրել խորհրդարանի ցրման և սեպտեմբերի 6-ին ընտրություններ անցկացնելու մասին:

Նոր կառավարությունը հայտարարել է, որ մինչ այդ իշխող Դեմոկրատական կուսակցությունը ցանկանում է դատավորների միջոցով ուզուրպացնել իշխանությունը: