ԱՄՆ-ի Սենատում չնչին տարբերությամբ գերակշռող ուժ դարձան դեմոկրատները

ԱՄՆ-ում նոյեմբերին տեղի ունեցած միջանկյալ ընտրությունները պաշտոնապես ավարտված են: Ջորջիա նահանգում Դեմոկրատական կուսակցությունը ներկայացնող Ռաֆայել Ուորնոքն ընտրությունների երկրորդ փուլում առաջ է անցել իր հանրապետական մրցակից Հերշել Ուոքերից, ինչի շնորհիվ դեմոկրատները Սենատում կունենան 51 տեղ, իսկ հանրապետականները՝ 49: Այս մասին հաղորդում է CNN-ը:

Գործող Սենատում երկու կուսակցությունների տեղերը հավասարապես են բաշխված՝ յուրաքանչյուրն ունի 50 տեղ: Չնայած ընտրությունների արդյունքներով արձանագրված չնչին տարբերությանը՝ դեմոկրատներն այժմ մեծամասնություն կկազմեն սենատի բոլոր հանձնաժողովներում, ինչը նրանց հնարավորություն կտա ավելի արագ մշակել օրենքներ, ավելի հեշտությամբ հաստատել ԱՄՆ նախագահ Ջո Բայդենի առաջադրած թեկնածուներին, ունենալ ավելի մեծ աշխատակազմ և մեծ բյուջե:

Ջո Բայդենը հեռախոսազանգով շնորհավորել է Ռաֆայել Ուորնոքին ընտրվելու առթիվ:

Ըստ CNN-ի՝ այս ընտրություններն առանձնացան նրանով, որ գործող 29 սենատորներից յուրաքանչյուրը, ով առաջադրվել էր վերընտրվելու համար, հաղթեց: Սա առնվազն 100 տարվա ընթացում առաջին դեպքն է, երբ վերընտրվելու համար պայքարող ոչ մի գործող սենատոր չի պարտվել:

Միջանկյալ ընտրությունների արդյունքներով Կոնգրեսի Ներկայացուցիչների պալատում մեծամասնություն կկազմեն հանրապետականները, որոնք ունեն 222 տեղ: Դեմոկրատները Ներկայացուցիչների պալատում ունեն 213 տեղ:

ԱՄՆ-ի 118-րդ կոնգրեսի առաջին նիստը տեղի կունենա 2023 թ.-ի հունվարի 3-ին: