Բրիտանիայի վարչապետ Մեյը հնարավոր է` իր հրաժարականի մասին հայտարարի ուրբաթ օրը. Times

Մեծ Բրիտանիայի վարչապետ Թերեզա Մեյը հնարավոր է, որ ուրբաթ հայտարարի հրաժարականի մասին: Այս մասին հաղորդում է Times պարբերականը՝ վկայակոչելով Մեյի կողմնակիցներին:

Հիշեցնենք` չորեքշաբթի երեկոյան Մեծ Բրիտանիայի խորհրդարանի Համայնքների պալատի ղեկավարը` Անդրեա Լիդսոմը, հրաժարականի դիմում էր ներկայացրել Մեյի հետ Brexit-ի հարցում ունեցած տարաձայնությունների պատճառով:

Times-ի պնդմամբ` Մեյի կողմնակիցները կարծում են, որ վարչապետն իր հրաժարականի մասին կհայտարարի սըր Գրեհեմ Բրեյդիի (Թերեզա Մեյի ղեկավարությամբ գործող Պահպանողական կուսակցության անդամ) հետ հանդիպումից հետո:

Մեյը, հուսալով ստանալ Brexit համաձայնագրի վերաբերյալ պատգամավորների աջակցությունն ու հովանավորությունը, ավելի վաղ մի քանի խոստումներով էր հանդես եկել: Խոստումներն, ըստ նրա, կարող էին փաստաթղթի ընդունմանը դեմ հանդես եկողներին հակառակ կարծիքի բերե. փաստաթուղթն արդեն չորրորդ անգամ խորհրդարան կներկայացվի հունիս ամսվա սկզբին:

Հավելվում է նաև, որ Մեյի հայտարարություններից, թերևս, ամենահատկանշականն այն խոստումն է, որ բրիտանական խորհրդարանին հնարավորություն կտրվի քվեարկելու երկրորդ հանրաքվե անցկացնելու և ԵՄ-ի հետ ապագա առևտրային հարաբերությունների հետ կապված հարցերի վերաբերյալ: