«Սբ Գրիգոր Լուսավորիչ» հիվանդանոցում աշխատակիցների միջև ծեծկռտուք է տեղի ունեցել

Երևանի «Սուրբ Գրիգոր Լուսավորիչ» բժշկական կենտրոնի աշխատակազմում անառողջ մթնոլորտ է տիրում, որը հանգեցրել է ծեծկռտուքի։ Այս մասին տեղեկացնում է «Փաստինֆո»-ն։ 

Մասնավորապես` բռնություն է գործադրվել հիվանդանոցի տեխնիկայի անվտանգության պատասխանատու Վաչե Գյոզալյանի նկատմամբ։ Վիճաբանության մյուս կողմը ևս հվանդանոցի տնտեսական մասի աշխատակից է, որը վերջերս է նշանակվել տնօրենի կողմից և համարվում է նրա «մարդը»։

Լրատվական կայքը փորձել է կատարվածի հանգամանքները ճշտել տուժողից, ով ակնհայտ կաշկանդված է եղել և նախընտրել է չխոսել։ Միջադեպի մասին լրագրողի հարցին ի պատասխան Վաչե Գյոզալյանն ասել է․ «Ինչ կարևոր է»։ Հաջորդ հարցին՝ արդյոք կատարվածի մասին տեղյակ պահե՞լ է հիվանդանոցի տնօրեն Արման Հովհաննիսյանին՝ զրուցակիցը դրական է պատասխանել, իսկ երբ հետաքրքրվել են, թե որն է եղել տնօրենի արձագանքը՝ տուժածը խնդրել է ավելի ուշ զանգահարել։ Երկրորդ հեռախոսազրույցի ժամանակ՝ նա ասել է, որ ցանկություն չունի այդ մասին խոսելու և խնդրել է իրեն չանհանգստացնել։