Վերջին 30 տարվա ընթացքում ՀՅԴ-ն բոլոր ընտրություններին ինքնուրույն է մասնակցել, չի գնացել որևէ դաշինքի, որ ստանա մեծ քվե. Իշխան Սաղաթելյան

Եթե նախկին իշխանությունները լավը լինեին, այսօր իշխանության ղեկին կլինեին. լրագրողների հետ հանդիպման ժամանակ ասաց ՀՅԴ Հայաստանի ԳՄ ներկայացուցիչ Իշխան Սաղաթելյանը՝ պատասխանելով հարցին, թե Դաշնակցությունը նախորդ իշխանության հետ կոալիցիա է կազմել, արդյո՞ք գործող իշխանություններն ավելի վատն են, քան նախորդները:

«Երբ մենք ընկնում ենք համեմատության մեջ, գնում ենք ուրիշ ուղղությամբ: Եթե նախկինը լավ լիներ, այսօր իշխանության կլիներ: Եվ այս իշխանությունների թերություններն ու անգործությունը մենք հաճախ արդարացնում ենք` նախկինների հետ համեմատելով: Մեր ժողովուրդն այս իշխանություններին տվել է վստահության բարձր քվե, ուստի ունի մեծ ակնկալիք, սպասումներ, որոնք այսօր չեն արդարացվում: Եվ դրա համար մենք քննադատում ենք և դրա իրավունքն ունենք: Անցնող մեկ տարվա ընթացքում իշխանությունները համակարգային որևէ բարեփոխում մեր երկրում չեն սկսել, նույնիսկ ամբողջական պատկերացում չունեն դրա մասին: Չեն ասում, թե ինչ են պատրաստվում անել, բացի լոզունգային հայտարարություններից: Ինչ վերաբերում է ՀՀԿ-ի հետ համագործակցությանը, Սերժ Սարգսյանի իշխանության տասը տարիներին մենք իշխանության ենք եղել ընդամենը 2 տարի 8 ամիս, Սերժ Սարգսյանի երկու ընտրություններում մենք նրան չենք պաշտպանել. առաջինի ժամանակ սեփական թեկնածու ենք ունեցել, երկրորդի ժամանակ կոչ ենք արել քվեարկել այլ թեկնածուի օգտին: Վերջին 30 տարվա մեջ ՀՅԴ-ն բոլոր ընտրություններին ինքնուրույն է մասնակցել և չի գնացել որևէ դաշինքի, որ ստանա մեծ քվե, որևէ մեկի հետ ընտրություններին չի մասնակցել, այլ ներկայացրել ենք մեր ծրագրերը և ընտրություններին մասնակցել ինքնուրույն: Դժբախտաբար, մենք մեծ քվե չենք ստացել, որ ձևավորենք միայնակ իշխանություն և մեր ծրագրերն ամբողջական իրականացնենքւ, ուստի այս տարիների ընթացքում, այո, համագործակցել ենք այլ կուսակցությունների հետ, ինչը լիարժեք արդյունք չի տվել, բայց նաև ձեռքբերումներ ենք ունեցել»,-շեշտեց Սաղաթելյանը: