Ցեղասպանությունը վերապրած 108-ամյա Եպրաքսյա Գևորգյանը ծաղիկներ խոնարհեց Ծիծեռնակաբերդում. տեսանյութ

Ցեղասպանությունը վերապրած, Կարսից գաղթած Եպրաքսյա տատիկը ցանկություն էր հայտնել ապրիլի 24-ին Ծիծեռնակաբերդի հուշահամալիրում ծաղիկներ խոնարհելու: Տատիկի հարազատները դիմել էին Հայոց ցեղասպանության թանգարան-ինստիտուտ հիմնադրամին, անցագիր ստացել, որ Եպրաքսյա տատիկին կարողանան մինչև հուշահամալիր ուղեկցել:

Ծաղիկներ խոնարհելուց հետո տատիկը լրագրողներին պատմեց, որ Կարսից գաղթել են Օշական, հետո գնացել  Աշտարակ, Եղվարդ, հետո` Գյումրի: «Այնտեղ հանդիպեցինք Ասքանազ Մռավյանին, նա մեզ տարավ երկու հարկանի տուն: Մեզ ասաց՝ մտեք այստեղ, յոլա գնացեք, մինչև տեսնենք, ինչ է լինում»,- միայն այդքանը կարողացավ պատմել տատիկը:

Եպրաքսյա Գևորգյանի անձնագրում որպես ծննդյան տարեթիվ նշվում է 1914 թ., սակայն հարազատներն ասում են, որ նա ավելի վաղ է ծնվել: