Սիրիական ճգնաժամը պետք է կարգավորվի տարածաշրջանի երկրների միջև երկխոսության միջոցով. Զարիֆը` Անկարայում

Սիրիա կատարած աշխատանքային այցի ավարտին Իրանի ԱԳ նախարար Մոհամադ Ջավադ Զարիֆը մեկնել է Թուրքիա. տեղեկացնում է ԻՌՆԱ-ն: Անկարայի միջազգային օդանավակայանում լրագրողների հետ ճեպազրույցի ժամանակ նա անդրադարձել է դամասկոսյան իր հանդիպումներին:

«Կայացած հանդիպումներն արդյունավետ էին: Պետք է առանձնացնեմ հատկապես նախագահ Ասադի հետ հանդիպումը: Օգտաշատ քննարկում ծավալվեց Աստանայի գործընթացի եւ երկկողմ հարաբերությունների ուղղությամբ»,- ասել է նա:

Իրանի արտաքին քաղաքական գերատեսչության ղեկավարը նշել է, որ կայացած հանդիպումների ժամանակ ուշադրության կենտրոնում է եղել սիրիական ճգնաժամի քաղաքական կարգավորումը եւ աստանյան գործընթացը, Եփրատի արեւելյան շրջանի եւ Իդլիբի հարցը:

«Թուրքիա այցի ընթացքում նույնպես քննարկելու ենք տարածաշրջանային իրադարձություններն ու զարգացումները: Հատուկ անդրադառնալու ենք Սիրիայի եւ Հյուսիսային Աֆրիկայի թեմաներին, քննարկելու ենք նաեւ երկկողմ հարաբերությունների ընթացքը»,- ասել է Զարիֆը՝ հավելելով. «Մենք շահագրգիռ ենք, որպեսզի սիրիական ճգնաժամը կարգավորվի տարածաշրջանի երկրների միջեւ երկխոսության միջոցով»: