Ցանկալին իրականության հետ շփոթելու տպավորություն է թողնում. պատգամավորը` կոռուպցիոն սկանդալի մասին

Իհարկե, բոլորս էլ կուզեինք, որ Հայաստանում համակարգային կոռուպցիան վերացած լիներ, բայց փաստերն ու առաձին դրվագներ այլ բանի մասին են վկայում. ԱԺ ճեպազրույցների ժամին ասաց ԲՀԿ խմբակցության պատգամավոր Իվետա Տոնոյանը` անդրադռնալով առողջապահության փոխնախարարին կոռուպցիայի կասկածանքով ձերբակալելուն:

«Իհարկե, մանրամասները կներկայացվեն ու կպարզվեն գործի քննման ժամանակ, բայց նմանօրինակ դրսևորումներն անընդունելի են նոր Հայաստանում»,- ասաց նա:

ԲՀԿ պատգամավոր Գևորգ Պետրոսյանի կարծիքով էլ` երբ հայտարարվում է, թե ՀՀ-ում համակարգային կոռուպցիա չկա, ցանկալին իրականության հետ շփոթելու տպավորություն է թողնում:

«Կոնկրետ ձերբակալման մասին դատողություն չեն կարող դեռևս անել, բայց ակնհայտ է, որ ՀՀ-ում, փաստորեն, կոռուպցիան հաղթահարված չէ: Իհարկե, չենք կարող ասել, թե այդ ուղղությամբ պայքար չի տարվում. ԱԱԾ-ն առավել քան երբևէ ակտիվ է: Մյուս կողմից` այսօր այնքան հաճախ են դարձել ձերբակալությունները, ազատ արձակումը, կալանավորվումը, ազատ արձակումն ու հետո էլի կալանավորումը, որ հանրությունը մոլորության մեջ է ընկնում: Արդարադատություն պետք է իրականացնել հնարավորինս սեղմ ժամկետում, հատկապես, որ ՄԻԵԴ-ն իրավական դիրքորոշում ունի, որ արդար դատաքննության կարևոր տարրերից մեկը ողջամիտ ժամկետով քննությունն է: Պարզապես հանրությունն ակնկալում է արագ լուծում, որ տարիներով չձգեն, որ տպավորություն չլինի, թե քաղաքական ենթատեքստ կա»,- նշեց նա: