Ավստրալիան նախատեսում է վտարել ընտանեկան բռնությանն առնչվող հոդվածներով դատապարտվածներին

Ավստրալիայի իշխանությունները նախատեսում են անվավեր համարել այն զբոսաշրջիկների վիզան, որոնք ընտանեկան բռնության համար դատապարտվել են մեկ տարի և ավելի ժամկետով: Երկրում այս հոդվածով դատվածություն ունեցող ճանապարհորդներին վտարում է սպառնում: Այս մասին հաղորդում է getaway.co.za-ն:

Ավստրալիայում փետրվարի վերջին ուժի մեջ են մտել օրենսդրության մեջ կատարված լրացումները, որոնցով նախատեսվում է վտարել բոլոր այն քաղաքացիներին և զբոսաշրջիկներին, որոնք դատապարտվել են ընտանեկան բռնությանն առնչվող հոդվածներով:

Կայքը հաղորդում է, որ, ըստ Ավստրալիայի առողջապահության և սոցիալական ապահովության ինստիտուտի, Ավստրալիայում 6 կնոջից մեկը ենթարկվել է ֆիզիկական կամ սեռական բռնության: Նրանց ավելի քան 54 %-ը բռնության է ենթարկվել զուգընկերոջ կողմից:

«Մեր երկրում յուրաքանչյուր կին և երեխա իրավունք ունի իրեն անվտանգ զգալու»,- հայտարարել է ընտանիքում բռնության դեմ պայքարի բարեգործական կազմակերպության հիմնադիր Նիկոլ Էդվարդսը` հավելելով. «Անհրաժեշտ է բացարձակ անհանդուրժողականություն դրսևորել այն անձանց հանդեպ, որոնք հակված են ընտանիքում բռնության, հետևաբար` մեր կազմակերպությունն աջակցում է  այս նախաձեռնությանը»: