Իսլանդիայի կառավարությունը երկարաձգել է կետորսության թույլտվությունը

Իսլանդիայի կառավարությունը որոշել է  առաջիկա հինգ տարիների համար  երկարաձգել կետորսության թույլտվությունը: Այս մասին հայտնում է Sveriges Radio-ն:

Նշվում է, որ տարեկան քվոտան կկազմի 209 ֆինվալ և  217 մանր շերտավոր կետ: Կետի արդյունահանումը շարունակելու թույլտվությունը ստորագրել է ձկնորսության հարցերով նախարար Քրիստիան Ֆոր Յուլսոնը՝ չնայած համաշխարհային հանրության խիստ քննադատությանը:

Ռադիոկայանը տեղեկացնում  է`  բացի այդ,  հասարակական կարծիքի վերջին հարցումների տվյալներով՝ Իսլանդիայի բնակչության մեծամասնությունը նույնպես դեմ է կետորսությանը:

Երկրի կառավարությունն, իր հերթին, պնդում է, որ արդյունահանումը պատասխանատու կերպով է կատարվում` հսկողության ներքո և գիտական հետազոտությունների արդյունքներին համապատասխան:

Հավելենք, որ Իսլանդիան կետորսությունը վերականգնել է ավելի քան 10 տարի առաջ: Այդ ժամանակից ի վեր երկրի դեմ գործում են ԱՄՆ պատժամիջոցներ: