Արարատ Միրզոյանը հայտնում է սահմանադրական փոփոխությունների օրակարգի առկայության մասին

ՀՀ Ազգային ժողովի նախագահ Արարատ Միրզոյանը հայտնում է, որ սահմանադրական փոփոխությունների վերաբերյալ օրակարգ ունեն: Դրանում, սակայն, մասշտաբային փոփոխություն` խորհրդարանական կառավարման համակարգից անցում կիսանախագահականին, չի լինի:  

ԱԺ-ում լրագրողների հետ ճեպազրույցում նա ասաց. «Սահմանադրական փոփոխություններ հնարավոր են, թեև կարծում եմ, որ ոչ այդպիսի մասշտաբային փոփոխություններ, որ երկիրը խորհրդարանականից դարձնենք կիսանախագահական: Մեր օրակարգում սահմանադրական փոփոխություն կա: Շրջանակն առայժմ հստակեցվում է: Մենք այս ընթացքում տեսանք, որ կան բացեր, իրավիճակներ, երբ Սահմանադրությունը չի կարգավորվում, և հնարավոր են փակուղիներ: Այս ամենը պետք է ուսումնասիրենք»:

Հարցին` հնարավո՞ր է լինի նաև ՀՀ նախագահի լիազորությունների վերանայում, Միրզոյանը պատասխանեց` գուցե:

Նա հայտնեց, որ անպայման կընդգրկվի նաև Ընտրական օրենսգրքի վերանայման հարցը:

ԱԺ նախագահը շեշտեց` ինքն ամենևին կիսանախագահական համակարգին վերադառնալու կողմնակիցը չէ, կարծում է, որ հիմա ամեն ինչ պետք է անել խորհրդարանական համակարգի կայացման համար: