Անսպասելի էր, որ մեր խոսքն իշխանությունները թրոլինգի ու սպառնալիքի վերածեցին. Մարուքյան

Խորհրդարանում կառավարության ծրագրի քննարկմանն ընթացքը անակնկալ էր ԼՀԿ-ի համար, որովհետև չէինք սպասում, որ ընդդիմադիր խոսքը կարող է վերածվել «թրոլինգի, ձեռք առնելու, մուննաթի, նաև որոշ դեպքերում ` սպառնալիքի». այսօրվա խորհրդարանական ճեպազրույցների ժամին հայտարարեց  «Լուսավոր Հայաստան» խմբակցության ղեկավար Էդմոն Մարուքյանը` նշելով, որ նիստից հետո կուսակցությունը ատելության խոսքի հարձակման է ենթարկվել, ինչպես նաև որոշակի մեդիա մանիպուլյացիաների, կեղծ լուրերի թիրախ է դարձել: Բայց այդ ամենը, ըստ պատգամավորի, չի խանգարելու իրենց, ու իրենք զուսպ, հանգիստ, հետևողական շարունակելու են աշխատել` հավատարիմ մնալով իրենց սկզբունքներին:

Մարուքյանը բնական է համարում իշխանությունների պնդումները, թե որևէ ճնշում չի եղել, ընդամենը քաղաքական բանավեճ է եղել:

Ինչ վերաբերում է «Իմ քայլը» խմբակցության պատգամավոր Լենա Նազարյանի այն դիտարկմանը, թե ընդդիմությունը հնարավորություն է ունեցել հարցեր տալու, և թերևս առաջին անգամ էր, որ քվեարկության հարցում անկաշկանդ էին, պատգամավորը զարմացավ. «Ինչպե՞ս դա հասկանալ, նոր Հայաստանում հարցեր տալն արդեն ձեռքբերո՞ւմ է համարվում: Ի՞նչ է, գալու էին` ծեծեի՞ն: Եթե դա պրոգրես է, ապշած եմ»:

Դառնալով Yerkir.am-ի հարցին, թե ո՞ւմ նկատի ունեն իշխանությունները` ընդդիմությանն անկաշկանդ չլինելու մեջ մեղադրելով, Մարուքյանը պատասխանեց. «Տարօրինակ է այդ դիտարկումը, որովհետև թե՛ «Ժառանագություն»-ը, թե՛ ՀԱԿ-ը, թե՛ «Արդարություն դաշինքը» կամ ԱԻՄ-ը կարողացել են ազատորեն դեմ լինել: Փոխհրաձգություն չկար մեր և իշխանության միջև, կար դեբատ, ինչից, հուսով եմ, բոլորը դասեր են քաղել և կշարունակեն քաղաքակիրթ աշխատանքը»: