Բաց ենք երկխոսության համար, սակայն չենք հանդուրժելու ճնշումն ու պարտադրանքը. ԻԻՀ նախագահ

Կառավարության այսօրվա նիստում Իրանի Իսլամական Հանրապետության նախագահ Հասան Ռոհանին նշել է, որ երկիրը բաց է երկխոսության համար, սակայն երբեւէ չի հանդուրժելու ճնշում ու պարտադրանք. տեղեկացնում է ԻՌՆԱ-ն:

Անդրադառնալով երկրի տնտեսական վիճակին եւ ԱՄՆ-ի կողմից գործադրվող ճնշումներին` նա նշել է, որ ԱՄՆ-ն այսօր Իրանի ժողովրդին տնտեսական, քարոզչական եւ հոգեբանական պատերազմ է պարտադրել, որը ,բնականաբար, իր բացասական հետեւանքներն է ունեցել հասարակության վրա:

«Սակայն ժողովուրդը չի կամենում հանձնվել եւ հաստատակամորեն պաշտպանելու է իր արժանապատվությունն ու անկախությունը»,- ասել է Ռոհանին՝ հավելելով. «Իհարկե, եթե որեւէ մեկը ցանկանա փոխադարձ հարգանքի, արժանապատվության եւ միջազգային օրենքների սահմաններում որոշակի թեմայի շուրջ երկխոսել մեզ հետ, մենք բաց ենք լինելու երկխոսության համար»: