Արծվիկ Մինասյանը` որպես նախարար, պարգևատրում չի ստացել

ՀՅԴ մասնագիտական հանձնախմբերի համակարգող Արծվիկ Մինասյանը, այսօրվա մամուլի ասուլիսում անդրադառնալով պարգևատրումների հարցին, նշեց, որ իր՝ էկոնոմիկայի նախարար եղած ժամանակ եռամսյակը մեկ պարգևատրումներ են եղել, բայց ինքը` որպես նախարար, երբեք չի ստացել: Նույն սկզբունքը գործել է բնապահպանության նախարարությունում: 

«Առաջին անգամ կիրառեցի հետևյալ մոդելը՝ նախարարը չպետք է իրեն պարգևատրի, երկրորդ՝ բոլոր աշխատողների գնահատումները ներքևից վերև սկզբունքով պիտի լինեն, այն է՝ բաժնի պետը բաժնի աշխատակիցներին է պարգևատրում, բաժնի պետին՝ վարչության պետը, վարչության պետին՝ փոխնախարարը, նրան էլ` նախարարը: Այո, պարգևատրումներ տվել ենք աշխատակիցներին, նախարարը չի ստացել պարգևատրում: Այս սկզբունքը տարել եմ հետո բնապահպանության նախարարություն: Տրվել են պարգևատրումներ 800 հազարից մինչև 1.3 միլիոն դրամ»,- հայտնեց Մինասյանը՝ նշելով, որ եռամսյակային կտրվածքով պարգևատրվել են հատկապես միջազգային տնտեսական կապեր ապահովող և ներդրումային ոլորտում ակտիվություն ցուցաբերած աշխատակիցները: