Տնտեսական հեղափոխություն ազդարարելով` գործադիրը հավանություն տվեց կառավարության ծրագրին

Կառավարությունն այսօր արտահերթ նիստ էր հրավիրել, օրակարգում էր կառավարության ծրագիրը, որն այսօր պետք է Ազգային ժողով ներկայացվի: Գարծադիրի անդամներին այն ներկայացնում էր փոխվարչապետ Մհեր Գրիգորյանը:

«Առավելագույնս մշակել ենք, հաշվի առել ստացած առաջարկները, արդյունքում` շատ լավ ծրագիր ստացանք»,- ասաց նա:

ՀՀ վարչապետ Փաշինյանն էլ հավելեց` կառավարության ծրագրի շուրջ եղած արձագանքները ևս հաշվի են առել: «Այս ծրագիրը համապատասխանում է մեր ունեցած հայեցակարգային պատկերացումներին: Մեր հայեցակարգային պատկերացման համար շատ անկյունաքարային նշանակություն ունի հետևյալը՝ մենք հռչակել ենք տնտեսական հեղափոխության հայեցակարգը ու ազդարարում ենք տնտեսական հեղափոխության մեկնարկը», - նշեց նա:

Հարցը դրվեց քվեարկության: Կառավարության ծրագրին գործադիրի ամբողջ կազմը կողմ քվեարկեց: