Վարդենիսի թեկնածուի անունից սննդամթերք են տարել մի ընտանիքի՝ հորդորելով քվեարկել նրա օգտին. ոստիկանություն

Ոստիկանության Վարդենիսի բաժնի ծառայողների ձեռնարկած օպերատիվ-հետախուզական միջոցառումների արդյունքում պարզվել է, որ փետրվարի 17-ին կայանալիք Վարդենիս համայնքի ղեկավարի ընտրությունների թեկնածուն և նրա 2 համախոհները «Ֆորդ Տրանզիտ» մակնիշի ավտոմեքենայով այցելել են Վարդենիս համայնքի բնակիչների բնակարաններ և սննդամթերք բաժանել:

ՀՀ ոստիկանությունից  տեղեկացնում են `վերոնշյալ անձինք  հայտնել են նաև, որ դա վերջինիս կողմից օգնություն է ու կրելու է շարունակական բնույթ:
Հետագայում պարզվել է, որ օգնությունը տրամադրվում է մի ՍՊԸ-ի կողմից, մինչդեռ օգնություն բաժանողները քաղաքացիներին ներկայանում են համայնքապետի թեկնածուի անունից:

Ոստիկանության Վարդենիսի բաժնի ծառայողների ձեռնարկած օպերատիվ-հետախուզական միջոցառումների արդյունքում պարզվել է, որ թեկնածուի անունից փետրվարի 3-ին նրա համախոհները օգնություն են տարել Վարդենիսում բնակվող մի ընտանիքի:

Տանտիրոջից ընդունվել է հաղորդում: Վերջինս հայտնել է, որ այդ անձինք թեկնածուի անունից իրենց ընտանիքին, որպես օգնություն, տվել են բրինձ, ոսպ, հնդկաձավար, ձեթ, խտացրած կաթ, ձու և հորդորել են քվեարկել թեկնածուի օգտին:
Ոստիկանները պարզել են նաև, որ նույն թեկնածուի անունից փետրվարի 2-ին նրա համախոհները օգնություն են հատկացրել վարդենիսցի մեկ այլ ընտանիքի ևս: Ոստիկանությունում քաղաքացուց ընդունվել է հաղորդում, ըստ որի` հատկացված սննդամթերքը տրվել է թեկնածուի կողմից:

Կատարվում է քննություն: